Online Reporter
YiNtatheli kaMthunywa
KULENDODA esuka ngaphansi kwenduna uMadabe ePlumtree uTafirei Ndlovu (38) ogwetshelwe izigwebo ezimbili zikadilikajele kulandela ukutholakala elecala lokubulala lokutshisela abakwabozala endlini ngoba eyaliwe ngumkakhe.
Umsolwa kunye lomngane wakhe, uKudzanai Mathukuthu olokhe engakabotshwa bafika phakathi kwamabili mhlaka 14 Mabasa ngomnyaka ka2022 bahlasela uyisezala loninazala ngamahloka andubana babahudulele emkulwini lapho abafika babatshisela khona.
Umehluli esethula isigwebo uthe uNdlovu, edala amacala la wayewacabangisisile futhi enziwa kungelasizatho esiqinileyo.
Kuzwakale ukuthi mhlaka 14 Mabasa uNdlovu watshayela uninazala ucingo esithi ufuna ukuzokhumisana umlotha lomkakhe owayesefulathele umuzi wabo eBotswana waphenduka ngakibo ngemva kweminyaka engu-13 bebonke.
UNdlovu kulokuba afike kukhanya, wafika kwabozala phakathi kwamabili wahlasela uyisezala uXolani Mpofu loninazala uSibalungele Ncube ngehloka. Ngemva kwalokho babahudulela emkulwini babuye bawulumathisa izidumbu ziphakathi.
Isehlakalo lesi esitshwaqisa umzimba senzakala ngehola lesibili ekuseni njalo unkosikazi kametheswacala wayebukele abazali bakhe bobabili behlaselwa ngumkakhe.
Wabuye wathumba unkosikazi wakhe wambamba ngamandla ukuthi babuyele eBotswana ngendlela engekho emthethweni. Ngenhlanhla wenelisa ukubikela amapholisa ayesemngceleni ukuthi uthunjiwe lokuthi abazali bakhe babulewe ngumetheswacala.
UNdlovu lomngane wakhe bazama ukubaleka kodwa uNdlovu wabanjwa lo omunye wadliwa ngumswenya.
