Online Reporter
Brandon Moyo
SELIVELA iphupho le-Western Suburbs Panthers lokubusa kumdlalo we-rugby kuligi yeBulawayo Metropolitan Rugby Football Board (BMRFB) Archer Clothing Under-20, nanko selinqobe imidlalo emihlanu ilandelana.
Iqembu leli linqobe iMatabeleland Warriors 11-10 njalo selilemiklomelo engamatshumi amabili. Okwakhathesi likholisa ukukhokhela ngemiklomelo emine, lilandelwa yi-Old Miltonians elemiklomelo elitshumi lasitshiya galombili. I-Old Miltonians isinqobe imidlalo emine.
Kumdlalo wayo odluleyo, linqobe iHighlanders 8-0.
Kweminye imidlalo ebisenkundleni yeHartsfield ngempelaviki, iPlumtree High Amabhubesi ikhulele iBulldogs ngokuyinqoba 49-0. Kumidlalo yabesifazane, iHighlanders leBulldogs ziqede zingutshiki lobhanqa 0-0. IPanthers itshaye iPlumtree 17-12.
Umdlalo obumkhulu ngempelaviki ubuphakathi kweBulawayo Probables lePossibles. Kunqobe iBulawayo Probables 25-20. Umdlalo lo uqhutshelwe ukukhethwa kweqembu elizamela isabelo sakoBulawayo kumncintiswano weNedbank Rugby Challenge ekupheleni kwalinyanga.
Ekhuluma ngemva kokuphethwa kwemidlalo yeviki lesihlanu kuligi, umqeqetshi wePanthers uBusani Ncube uthe kukhona okusamele bakulungisise.
“Asikafiki lapho esifuna ukuyakhona. Sisaxega. Singabe sinqoba imidlalo kodwa akungithabisi.
Imidlalo iyaqhubela kulimpelaviki.
