Online Reporter
Zimpapers Sports Hub
IQEMBU lama-Warriors lizadlala imidlalo yobungane leMorocco, kubika Inhlanganiso yeZimbabwe Football Association (ZIFA).
Lokhu kuvele ngemva kokuba iZIFA yenze isivumelwano seminyaka emibili sokusebenzisana leMoroccan Football Association (FRMF).
Ngokubika kwe-ZIFA, ukubambisana lokhu, okwenzakala ngoMgqibelo odluleyo, kuzaqinisa ukuthuthukiswa komdlalo webhola lenyawo emazweni womabili. Umongameli weZIFA uNqobile Magwizi ubeseMorocco lapho abelomhlangano lomongameli weFRMF uFouzi Lekjaa.
Kumbiko wayo ngalokhu, Inhlanganiso le ithe: “Umongameli we-ZIFA, uNqobile Magwizi, usayine isivumelwano esikhulu sokusebenzisana phakathi kweZimbabwe Football Association (ZIFA) le-Moroccan FA (FRMF).
IMorocco idlala ibhola eliphambili, nanko ikhokhela amaqembu e-Africa kulogu yamazwe njalo yaqeda ikusigaba sama semi-final kunkezo yomhlaba ngo-2022.
Kubikwa kuzaqhutshwa izifundo ezizaphathisa abaqeqetshi bakuleli.
Kusivumelwano lesi, kuzaqhutshwa inhlelo ezibalisela:
– Inhlelo zokufundisa abaqeqetshi, onompembe labaphathi bomdlalo.
– Ukuthuthukiswa komdlalo kwabasakhulayo labesifazane
– Ukuqoqwa kwemidlalo yobungane kuqembu elikhulu lakumaqembu abasakhulayo.
Ilizwe leMorocco lizaphatha imidlalo yenkezo ye-Africa Cup of Nations (Afcon) ka-2025, iphinde njalo ibambe le-2026 CAF Women’s Africa Cup of Nations.
Ukuphumelela kweMorocco emdlalweni kuzakhuthaza iZIFA ukuthi yenze okufanayo ukuze lama-Warriors aqale ukuthola impumelelo emincintiswaneni. IMorocco ilabadlali asebenze kakuhle emaqenjini aphezulu emhlabeni. Kubadlali laba kulo Archraf Hakimi odlalela iParis Saint Germain, unozinti uYassine Bonou, Sofyan Amrabat owadlalela iManchester United loHakim Ziyech.
Umongameli weZIFA wethekelele njalo laseNiger.
