Online Reporter
Nkosilathi Sibanda
UMGCINISIHLALO wenhlanganiso yeBulawayo Corporates Social Soccer League uTimothy Mandizadza usebonge wonke amankampani asekela inhlelo zemidlalo, ekhuthaza ukuthi aqhubekele phambili.
UMandizadza uthe imidlalo efana lebhola lenyawo iyaphathisa kakhulu ekuphakamiseni impilo zabadlali lokuqinisa imizimba lempilakahle yengqondo.
Uveze lokhu ngesikhathi ekhuluma leZimpapers Sports Hub ngoLwesibili kuliviki, mayelana ngesimo semidlalo yabo kuBulawayo Corporates Social Soccer League.
“Okukhulu okumele kwaziwe ngabantu yikuthi usekelo lwamankampani kwezemidlalo eqhutshwa yizisebenzi lubaluleke kakhulu.
“Ukusekela lokhu kwenza izisebenzi zenelise ukukhululeka, zethule ithalenta lazo lokuhlala kusimo esihle engqondweni lasemzimbeni. Yikho esikubonayo kumidlalo yethu kuBulawayo Corporates Social Soccer League,” kutsho uMandizadza.
“Sethula isibongo esikhulu kumankampani. Akuqhubeke kunjalo.”
Ukhulume njalo langokuqhutshwa kwemidlalo yabo.
“Siphuma kukhefu lePhasika lapho ebesilemidlalo yethu yeligi. Imidlalo le itshiye abalandeli bejabule kakhulu, lapho amanye amaqembu anqobe ngemiklomelo emikhulu, kuthi amanye imidlalo yawo yedluliselwe phambili ngezizatho ezithile.”
Kumidlalo yePhasika, i-Overnight ibe liqembu elikhanye kakhulu ngemva kokutshaya iCoca-Cola nge 5-0 emdlalweni. I-Speed Shipping layo yenze kuhle kakhulu yehlula iGrills nge 6-1.
I-Hope iqhubekile ngomumo wayo omuhle ngokunqoba iProton nge 3-1, kuthi i-Millennium leZimtile zidlale ngokulingana nge 2-2 emdlalweni. I-Value Gas yona inqobe iNust nge 3-2.
I-Rydings ibelenhlanhla yokuthola imiklomelo yonke kulandela ukuba khona kwe-walkover, i-Ostrich iyehluleke ukuza emdlalweni.
Kodwa-ke kube lemidlalo ethile engazange idlalwe, egoqela iSimbisa vs Evergold, ZETDC vs Warehouse Distributors leLonestar vs Chibuku.
Okwakhathesi, amehlo azakuthi nhlo kumidlalo yeviki lesithupha ezadlalwa mhlaka 11 Mabasa.
I-Evergold izadlala leLonestar, iRydings ibhekane leMillennium, kuthi iZimtile idlala leSimbisa. I-Value Gas yona izotholana leCoca-Cola.
I-Speed Shipping izabhekana le-ZETDC, i-Ostrich idlala leGrills. I-Overnight ileHope emdlalweni olindelwe kakhulu.
I-Nust izadlala leChibuku. IProton izahlangana leWarehouse Distributors, njengoba amaqembu eqhubeka efuna ukwakha umumo omuhle kuligi le.
