admin
Thokozile Mbedzi
ZISADIDEKILE izakhamizi zesigabeni seGuga eJotsholo kulandela ukuqhamuka komlilo otshabalalise imizi emithathu langa linye ngeviki ephelileyo okubangele ukuthi imuli lezi zisale egcekeni.
Kubikwa kube yisiphithiphithi emizini emithathu le elandelanayo nanko phela bezitshiyelana nje amahola ambalwa nxa zisitsha kodwa kungaziwa imbangela yomlilo.
UMthunywa uzwe ukuthi kuqale ukutsha umuzi kaMnumzana Mistros Mlalazi ngehola lika-10 ebusuku mhlaka 29 Zibandlela. Kubikwa kwaqala kwalumatha indlu eyodwa bathe bezama ukuyicitsha kwalumatha ezinye ezintathu.
Imuli le kubikwa ithe ibona ukuthi isisele egcekeni yazama ukumisa itende kodwa lalo laphinda latsha njalo.
Kuzwakale ukuthi imuli yakoMlalazi ithe ilokhu isakhakhamele, bezwa ngehola lesithathu emini sekuthiwa komakhelwane koMaDube lakho izindlu sezisitsha.
Kungakedluli isikhathi kubikwa koNyathi lakho izindlu zaqala ukulumatha ngehola lesine.
Ekhuluma lentatheli kaMthunywa uNkosikazi Lahliwe Moyo ongumakhelwane uveze ukuthi lokhu kubaqeda amandla njalo kabakaze bahlangane lakho.
“Lokhu kusiqeda amandla njalo kasikaze sihlangane lakho esigabeni sethu. Abantu laba kuyasimangalisa ukuthi kungani bonke batshelwa yizindlu ngosuku lunye.
Okunye okumangalisayo yikuthi loba izindlu zakhona zingabambananga zonke bezisitsha.
“Sikhuluma nje abantu bayangunguna ukuthi ingozi le kayiyodwa kukhona okutshaya amanzi. Mhlawumbe kukhona abakwenzayo akade bengasakuhambisi ngendlela yakho,” kuchasisa uNkszn Moyo.
“Kunjenje siyesaba lokubancedisa loba sisazi ukuthi behlelwe yingozi ngoba mhlawumbe uzathi uyasiza kuhle kube yikukuthwala kwakho ubone lawe usutshelwa ngumuzi.
“Sikhangelele ukuthi abadala besigaba bahlale phansi badingisise mhlawumbe kulesiko okumele liqhutshwe,” kutsho uNkszn Moyo.
Enye ingcitshi kwezamasiko njalo eyinyanga uMnumzana David Mhabhinyane Ngwenya ebuzwa ngodaba lolu uthe udaba olunje lufuna ukulandelwa kuhle kudingwe isisusa salo yikho ukuthi abantu laba bathole ukuthula.
“Udaba lolu lufuna ukuthi lulandelwe ngokwesiko ukuze kutholakale isisusa salo yikho ukuthi imuli lezi zithole ukuthula.
“Induna kunye labaphathi bezigaba kumele bahlanganise amakhanda babize abantu kuxazululwe udaba lolu ukuze kubonakale isisusa. Kanengi izinto ezinje zisuka ekuthini kuyabe kukhona abakwenzileyo imizi yomithathu le kodwa induna ingakulonda iqiniso liyaphuma sobala nxa isisebenza labaphathi bezigaba njalo lathi bakhululekile ukuba basidinge nxa bethe bahlangana lalapho osokubaxaka khona siphathisane,” kulandisa Mhabhinyane.
Isikhulumi samapholisa esabelweni seMatabeleland North uInspector Glory Banda ubuzwa ngodaba lolu uvumile wathi solufikile ewofisini yabo njalo basaphenyisisa ngembangela yomlilo lowu ukuba ungabe ubangelwe yini.
“Samukele udaba lwemizi emithathu etshe ngosuku lunye,” kutsho uInsp Banda.
Online Reporter