admin
YiNtatheli kaMthunywa
INHLELO zikaHulumende zokuvikela ukumemetheka kwegcikwane leCovid-19 kunyanga edluleyo ziphumelele nanko phela inani labantu abatholakale belalumkhuhlane kanye labaswelekileyo liyehla.
Ukusukumela phezulu masinyane ebeka izinga lesine lokuvalwa kwelizwe kukaHulumende kulandela ukukhuphuka kwenani labantu akade bebanjwa belalumkhuhlane kanye lababhubhayo ekuqaleni kwawonalo umnyaka kubelemiphumela emihle njengalokhu okutshengiswa yizibalo ezikhitshwe kunsukwana ezisanda kwedlula.
Inani labantu abaswelekayo lehlile lisuka ku 70 abake babhubha ngosuku olulodwa lisiya kwabangu-10 ababhaliswe mhlaka 7 kuyonale inyanga.
Abatholakala belalumkhuhlane ngelanga behlile kusuka ku 1112 mhlaka 14 Zibandlela kusiya ku 65 mhlaka 7 Nhlolanja.
Okunye okutshengisela ukuthi imizamo kaHulumende ilethe impumela enhle lizinga lokusila kwabantu bakuleli esilikhuphuke lisuka ku 57.6 percent mhlaka 12 Zibandlela laya ku 82.6 percent mhlaka 7 Nhlolanja.
Izinga lalabo abatholakala belomkhuhlane lo phakathi kwezinkulungwane ezihlolwa nsuku zonke lalo lehlile lisuka ku 36 percent laya ku 5.3 percent kusukela mhlaka 3 Nhlolanja.
UHulumende uzimisele ekulwiseni ukumemetheka kwalumkhuhlane, njalo amaZimbabwe akhuthazwa ukuthi aqaphele ukunganaki imilayo ekhona evikela ukuwubamba.
Online Reporter