Online Reporter
Ugwalo lulotshwe nguTommy Matshayile Ndlovu loDoris Nomathemba Ndlovu beloBekithemba Sodindwa Ncube
Izifuyo
Esintwini nxa kukhulunywa ngezifuyo kwakutshiwo inkomo lembuzi. Izimvu zazingandanga. Izifuyo lezi zazithathwa njengesikhonkwane somuzi. Umuzi ongelazo izifuyo wawungeke waba ngumuzi opheleleyo, uzifananele-nje lomuzi ongabethelwanga.
Umuzi wawusiba lomthuso wawo ongafani leye minye imizi. Ukuqakatheka kwezifuyo kubonakala ngemisebenzi yonke eqanjiweyo eyayisetshenzwa ngezifuyo. Ngenxa yalokho indoda yayithatha inyathelo eliqinileyo elokubona ukuthi izifuyo zayo zivikelekile njalo zanda ngemfanelo.
Esintwini izifuyo zazidingelwa umthuso. Umthuso lo kwakuthiwa ngowokwenza ukuthi inkomo zingaphunzi. Phezulu kwalokhu zazidingelwa ibaso njalo. Kudingwa izihlahla ezithile zigejelwe esangweni lesibaya, ezinye phakathi kwaso ezinye zitshiswe khonapho esibayeni.
Ibaso leli kuthiwa lenzelwa ukuthi izifuyo lezi zingaphongudliwa nje yizilo nxa zilahlekile zalala emangweni. Kwenza njalo ukuthi zingaphongungenwa yimikhuhlane. Ukulungiswa kwezifuyo ngale indlela kwakusenza ukuthi kube lemikhuba ethile okumele ilandelwe ekhaya lapha ukuze umthuso wezifuyo usebenze kuhle.
Lokhu-ke kwakusenza ukuthi umuzi munye ngamunye ube lesihlahla esithile okumele singabaswa loba leso sihlahla sibaswa kweminye imizi. Ngenxa yalokhu abesintwana babezihlonipha kakhulu inkomo zakibo, ezemzini bezesaba. Umuntu wesintwana wayengavunyelwa ukudabula phakathi komhlambi wenkomo zemzini.
Lokhu kwakusesabeka kakhulu nxa lowo owesintwana ezithwele ngoba kwakubangela ukuthi aswele. Uchago lwenkomo-ke lalo lwaludliwa ngemikhuba. Abantu bemzini babengaphongudla-nje uchago, kanti njalo umama osanda kubeletha wayengadli amasi.
Wayevunyelwa ukuwadla sekulesikhathi ebelethile. Uchago lwenkomo esanda kuzala, indlezane, lwalungangeni ngekhaya. Uchago lolo kuthiwa ngamahlaka. Amahlaka ayedliwa ngabafana abelusayo bewaphekela khonale esibayeni. Kuzakuthi lendiwo abapheka ngazo amahlaka la zigcinwe khonale esibayeni. Konke lokhu kwakusenzelwa ibaso lazo kumbe iziko lazo.
Ukutholakala kwezifuyo: Izifuyo ezisekhaya ngezikababa owayezithola ngendlela ezitshiyeneyo. Nanzi ezinye indlela ayethola ngazo izifuyo amadoda.
Ezelifa: lezi zinkomo umuntu ayeziphiwa ngemuva kokufa kukayise. Inkomo zomhambo: Njengomuntu oyindoda kunengi ayengakwenza okwakusenza ukuthi abantu bamhlawule ngenkomo kumbe ngembuzi.
Ukwelapha: Nxa engumuntu owazi izihlahla wayengaphiwa imbadalo esikhathini ibe yinkomo.
Ukubaza: Zikhona ezinye impahla ezibazwayo abanye ababesiba zingcitshi kuzo, ngakho labo abangakwazi ukuzenzela babezithenga kwabakwaziyo.
Yayingaphuma imbuzi kumbe inkomo, iphumela impahla ezinjengalezi: ingiga, isiganu, imiganu njalonjalo.
