Online Reporter
Ethel Ncube
ABALIMI sebekhuthazwe ukuthi banakekele amathole abo ngendlela eqondileyo njengoba isikhathi somqando sesisifikile.
Kubikwa amathole alakho ukubulawa ngumqando nxa enganakekelwanga kuhle.
UDokotela wezifuyo uMnumzana Peter Shumba ubike ukuba ngesikhathi somqando amathole ajayele ukufa ebulawa ngumqando kungakho kumele abalimi babone ukuthi ayavalelwa njalo ahlale endaweni ekhudumalayo.
Ekhuluma lentatheli uDokotela Shumba uveze ukuba abalimi abanakekele amathole.
“Ngesikhathi somqando inani lamathole afayo lijayele ukuba phezulu kubangelwa ngumqando. Abalimi abakhe izibaya zamathole eziqondileyo njalo nsukuzonke amathole kumele bawavalele ukuze athole ukukhudumala esibayeni.
“Khathesi yisikhathi samahlanga, abantu bayekela inkomo zilale egangeni zingenwa ngumqando. Kuhle ukuthi zilale esibayeni ngoba kulomquba owenza kukhudumale,” kutsho oDokotela Shumba.
“Nxa kuvuma wasikele utshani amathole akho ubuthe lamahlanga uwanike azidlele qeda lapho uthele amanzi anathe ukuze akhule kuhle ngoba ethola ukudla okwakha umzimba,” kutsho uDokotela Shumba.
Ubuye waveza ukuba abalimi kumele banakekele impilakahle yamathole.
“Impilakahle yamathole kumele liyiqakathekise. Kumele lihlale likhangela ukuba awalamikhaza njalo awaguli. Nxa ungabona angani amathole akho ayagula vakatshela umuntu weVeterinary Services oseduzane lawe abuye awakhangele ukuze kwazakale ukuthi kuyini okuluhlupho.
“Okunye amathole wekeleni amunye kubonina asuthe uchago lingawagubi ngokusenga uchago, uchago lolu luyawaqinisa njalo luyelapha luqinise amasotsha omzimba.
“Amathole angathola ukudla okwaneleyo, akhelwe isibaya esiqondileyo avalelwe, adibhiswe athengelwe lemithi efaneleyo akhula engawohlonzi lwaphezulu,” kuphetha uDokotela Shumba.
