Online Reporter
Nkosilathi Sibanda
UMKHANKASO kaHulumende wokulwisana lokusetshenziswa kwezidakamizwa ngabasakhulayo usuthole usekelo lwenkampani yeNetOne esibike ukuba izimisele ekuthini incedisane lomphakathi ngaphansi kohlelo lwayo lwe #ImpactingLives.
Inkampani yeNetOne ibiqhuba umkhosi weDrug and Substance Abuse Campaign and Life Skills Graduation esigabeni seBulilima, eMatabeleland South ngeviki edluleyo lapho obekuhlangene abasakhulayo, izakhamizi, abaphathi bakaHulumende, abafundisi, izisebenzi zempilakahle lenkokheli zomdabu.
Ngaphandle kokutshumayela ngobubi bezidakamizwa, iNetOne iphathise ngokwethula inhlelo zokufundisa umphakathi, ikakhulu abatsha kumisebenzi yezandla egoqela ukunusela, ukupheka, i-hotel and catering, ukwakha, ukubaza lokwenza imithi (ama-detergents).
Kubesobala ukuthi umphakathi weBulilima uzimisele ukuthi ufundise abasakhulayo ngobubi bokusebenzisa izidakamizwa lotshwala.
Kube lesitshengiselo sokuthi kuzalandelwa isinqumo esiqinileyo selizwe sokutshiyana lezidakamizwa, abatsha bakhethe ikusasa elihle.
INetOne, phansi kwephurojekithi yayo ethi #ImpactingLives, iphezulu kokuncedisana lengatsha zikaHulumende ekukhuthazeni umphakathi ukuthi ulwisane lezidakamizwa.
Lokhu kuvezwe ngumaqhuzu walinkampani yamagagasi okuxhumana, uEngineer Raphael Mushanawani obengomunye wabahlonitshwa kumbuthano weBulilima.
Umkhankaso weNetOne lo, wokuphakamisa abantu abahlala emaphandleni, usekela lombono kaMongameli Emmerson Mnangagwa, owabika ukuthi “Kasitshiyi muntu loba indawo emuva”.
Isigaba seBulilima sethule ubufakazi bokuthi umbono lo uqotho njalo uvele usetshenziswa lakunhlelo zenkampani le.
U-Eng Raphael Mushanawani uveze ukuthi iNetOne kayisiyo inkampani ye-data kuphela, kodwa iyingxenye ebaluleke kakhulu ekwakheni ilizwe labantu beZimbabwe.
“IBulilima kayisali emuva. Iyingxenye yekusasa leZimbabwe. Lokho esikubonayo, kulumkhankaso wokulwisana lezidakamizwa kuyintuthuko eqalisa emphakathini. Sihlanganisa abantu, siyakhula sonke. sithinta impilo zabantu,” kutsho uEng Mushanawani.
Uqhubeke wathi iNetOne izimisele ukuletha izixazululo ze-digital ezifana le-eLearning, ama-platforms ezokulima, kunye le-telemedicine ukuze kufinyelelwe umuntu wonke, kungakhathalekile indawo akuyo.
UMsekeli kaMphathintambo wogatsha lwe-ICT kuHulumende, uDingumuzi Phuti, ophinda abe ngummeli weBulilima ePhalamende, ukhuthaze intsha ukuba yamukele amathuba okuguqula impilo kwelingcono.
“Intsha ethola amathuba okufundela imisebenzi kumele isukumele phezulu, yakhe ikusasa elihle. Ikusasa lisezandleni zenu bantwana. Yiyo iZimbabwe esiyifunayo. Sithi kini, tshiyani izidakamizwa. Yamukelani amathuba. Yakhani ikusasa elihle. Izidakamizwa zibulala ikusasa lethu, kodwa imisebenzi yezandla iletha isithunzi.
“Ngobukhokheli bukaMongameli Mnangagwa, ukusekela kweNetOne, lobuqhawe bomphakathi weBulilima, iZimbabwe izanqoba.”
