Online Reporter
Danisa Masuku
UMTSHAYELI womtshova oleminyaka engu-28 yokuzalwa owalanda ixuku labantu endaweni okugadwa khona imitshova engekho emthethweni kuSixth Avenue koBulawayo, kwafa abantu ababili kwathi abangu-15 balimala, usegwetshiwe.
USimbarashe Chokumanyara, ohlala eMakhandeni, uvele ngoMvulo phambili kukamantshi weBulawayo Regional Court, uMnumzana Mathew Mutiro, lapho agwetshwe khona ukuthi ayepika iminyaka emithathu ejele.
Ubebhekane lamacala amabili okubulala lecala lokutshayela okungekho emthethweni.
Kwelinye lalinye lamacala okubulala ugwetshwe inyanga ezingu-24, kwasekulengiswa ezingu-18 kukhangelelwe ukuthi angadali icala elifanayo kuminyaka emihlanu ezayo. Kuthi kucala lokutshayela okungekho emthethweni ugwetshwe inyanga ezingu-12, kodwa eziyisithupha zazo esulwa. Uphinde wamiswa ukutshayela okwenyanga ezingu-24. Sekukonke, uzahlala inyanga ezingu-36 ejele. Ekwethuleni isigwebo sakhe, uMnu Mutiro uthe bonke abafakazi batshengise ukuthi umtshayeli wayegijima kakhulu.
“Umthethwandaba ukholwa ukuthi ukubamba kwakhe imiqobotsho yemota kwenzakala ngemva kokuba esetshaye umuntu. Ngenxa yokuthi leyondawo ilabantu abanengi, umtshayeli kwakungamelanga umtshayeli ahambe ngesiqubu ukuze ananzelele,” kutsho uMnu Mutiro.
UMnu Mutiro uthe ingcitshi eyahlola umtshova yathola ukuthi zonke ingxenye zemota zazisebenza kuhle njalo kwakungelaphutha.
“Umthethwandaba uphetha ngokuthi umtshayeli wayegijima kakhulu njalo ukuzivikela kwakhe esithi imota yayilephutha yikucabanga akwethule ngemva kwesikhathi. Uyazi indlela le ngoba uyayisebenzisa, njalo njengoba wayetshayela khonapho ngesikhathi santambama ngehola lesikhombisa lengxenye, kwakumele aqaphele. Inkantolo ithole ukuthi wayegijima kakhulu.”
UChokumanyara ubemelwe ngummeli wakhe, uMnu Kholwani Ngwenya oweTJ Mabhikwa and Partners. Ecela ukuthi isigwebo sehliswe, uNgwenya uthe:
“Ungumtshayeli osanda kuthola ichence ngoba ulithole kunyanga ezisanda kwedlula. Wehluleka ukumisa imota ngoba imiqobotsho le-steering kwakulephutha. Umdeni uthembele kuye njalo unakekela abazali bakhe abangaboni kuhle. Uphinde anakekele umkakhe lomntanakhe omncane. Usechithe inyanga ezinhlanu evalelwe esitokisini njalo ukufa kwabantu ababili ngenxa yengozi le kuzakuhlala kumhlupha impilo yakhe yonke.”
Ekhuluma ekhulisa ubukhulu becala, umtshutshisi uMnu Owen Mugari uthe:
“Umuntu otshayela imota ethwala abantu kufanele abe seminyaka emihlanu etshayisa kodwa ummangalelwa wayengakafikisi leyo minyaka. Kulahleke impilo ezimbili ngenxa yokutshayela kwakhe, kwathi abanye abangu-14 balimala. Kuyaziwa ukuthi kuSixth Avenue kugcwele abantu, ngakho ukugijima kakhulu kutshengisa ukunganaki. Izibane zemota zazisebenza kuhle, ngakho ukuzivikela kwakhe esithi kwakumnyama engaboni kuhle akulamandla.”
Ethula ubufakazi, uMugari uthe mhlaka 28 Zibandlela lonyaka, ngehola lesikhombisa lengxenye ntambama, uChokumanyara wayetshayela ikhombi yohlobo lweToyota Hiace, elenombolo yokubhalisa ezithi ACL 4788, kuSixth Avenue phakathi kukaLobengula Street loHerbert Chitepo Street.
Ikhombi yayithwele abantu abangu-17 njalo wayegijima ngesiqubu esikhulu.
Inkundla yezwa ukuthi uChokumanyara wehluleka ukulawula umtshova, watshelela watshaya abantu ababili ababehamba eceleni, abafela khona lapho. Abanye abangu-15 balimala.
