Online Reporter
Arron Nyamayaro
KWENZAKALE isimanga eArdbennie, eHarare, ngesikhathi imota ebithwele isidumbu ilumatha umlilo ngeSonto edluleyo.
Lokhu kudale ukuthi abafelweyo labanye abatshayeli bezimota baphuthume bayekhupha ibhokisi lomufi ngaphambi kokuba umlilo utshise imota yonke.
Imota le, ebingeyenkampani yeVadzidzi vaJeso Funeral Parlour, ibitshayelwa nguStuart Muyewa (26) ngesikhathi ilumatha umlilo kuBosh Off Drive.
Kubikwa ukuthi abemuli, izihlobo labanye bebesendleleni yokuya emangcwabeni emaphandleni ngesikhathi kusenzakala lesisehlakalo.
Abazibonela ngawabo bathi abantu baphangise ukuyakhioha ibhokisi lomufi, kwathi ngemva kwalokho balisa esontweni yeChurch of Jesus Christ of Latter-day Saints eseduze lendawo lapho imota etshele khona.
Omunye umfakazi uthe abeFire Brigade bafike umlilo usutshise imota yaphela.
Lesi sehlakalo sitshiye abanengi bethithibele, kwathi abanye babeke imibono ehlukeneyo enkundleni zokuxhumana mayelana ngengozi le. Amapholisa lokhu engakakhuphi umbiko ngesikhathi kudindwa indaba le.
