Online Reporter
Lovemore Dube
IQEMBU leHighlanders seliqinisekise ukuthi liqhubeka ngezingxoxo leHardrock FC mayelana ngokuthengiswa komdlali wasesiswini uMongameli Tshuma, okukhangelelwe ukuthi aye kuleliqembu ekuqaleni kwesizini ka-2027.
Sekulesikhathi kukhulunywa enkundleni zokuxhumana ukuthi uTshuma uzatshiya iBosso, kodwa isikhathi sokuthengwa lokuthengiswa kwabadlali siphele ngoLwesihlanu kungelasivumelwano esipheleleyo.
Osabambe isikhundla sikamgcinisihlalo weHighlanders, uKindman Ndlovu, uthe baqhube umhlangano leziphathamandla zeHardrock ngoMvulo ukuze baxoxe ngesicelo saleliqembu.
“Sibe lomhlangano ngoMvulo lapho akade sifuna ukuzwa ngesicelo seHardrock njalo sixoxe ngendlela yokuthi kungaba lesivumelwano esinjani. Nxa kukhona okuzaphuma, sizalazisa,” kutsho uNdlovu.
Kuzwakale ukuba iHardrock ifuna ukubhalisa uTshuma kodwa imvumele aqhubeke edlalela iHighlanders kuze kuphele isizini ka-2026,
Kubikwa njalo ukuthi iHardrock isizimisele ukubhadala imali efika ku-US$250 000 ukuze ithole umdlali lo.
Imizamo yokukhuluma lomphathi weHardrock, uWellington Mupandare, ayiphumelelanga ngesikhathi sokulotshwa kwendaba.
UTshuma, owake wadlalela iHwange leZebra Revolution, ube ngomunye wabadlali abaphakame kakhulu kulisizini. Umdlalo wakhe omuhle wenze wabizwa kuqembu lesizwe, amaWarriors, njalo ngumdlali othandwa kakhulu ngabalandeli beBosso ngenxa yobungcitshi bakhe.
