admin
Cornelius Luphahla
Zibambe oluphuphumayo izakhamizi zeZhombe ngemva kokuba amanye amadoda amathathu akule indawo ebhuqane, aze agamulana kubangwa intombi ebithandana lawo.
Loludaba lwenzakale ngoLwesine kuviki ephelileyo lapho uEdwin Moyo (18) adindane khona loLivious Ncube (24) kanye loDumisani Mathuthu (22) bebanga uCynthia Mloyi (23) obethi sekhethe ukwendela kuMoyo.
UNkosazana Julia Mloyi oyisihlobo sikaCynthia ubikele intatheli ukuthi laye kuyamethusa okwenziwa ngumntanomnewabo.
“Kangilankani ngomntanomnewethu ngesiga asenzileyo esigabeni njalo kangikaze ngikubone okunjeya.
Okwangidanisayo yikuthi kwathi ngethuba abafana laba sebesilwa yena wayelokhu edonsa uMoyo ethi kababaleke bahambe ngoba nguye amthandayo. Kukanti abanye ababili basebethwele amahloka laye wathutsha lawakhe ethi sezoncedisa isithandwa sakhe lesi ukulwa.
“Noma sesimbuza simkhuza ngobubi abenzileyo kazange asilalele wathi usazophindisela ukulimala kwesithandwa sakhe lesi njengoba sanyela ingalo. Abanye laba wathi kalandaba labo noma belimele ngoba kasabathandi,” kutsho uNkszn Mloyi.
Ekhuluma loMthunywa uMnumzana Cephas Ncube oyisakhamuzi sakule indawo uchaze ukuthi laye ubekhona kusenzakala indaba le ngakho kalankani.
“Sithwale nzima ngalelolanga abafana befuna ukubulalana sibili. Into eyangidanisayo yikuthi kwakungasakhanyi lokuthi abalwayo yibaphi bonke babetshayana asazi kumbe owayezehlula abanye nguye owayezathatha intombazana le. Kwathi ngesikhathi silamula uLivious wayeselimele umbala eganyulwe ngehloka, uDumisani sevuza igazi ekhanda kuthi uEdwin sehamba egodle ingalo.
“Kungayisithi esalamulayo laphana omunye wayezakufa sibili ngoba kwasekuluthuli,” kuchaza uMnu Ncube.
Kuzwakale ukuthi kwathi ngemva kokulwa kwabafana laba uCynthia wabaleka ngakibo wayazendisa kuEdwin ethi wenzela ukuthi amanye amajaha akhe abone ukuthi kasawafuni.
Usobhuku wakule indawo uMnumzana Felix Ndlovu ebuzwa ngale indaba uchaze ukuthi uyayazi.
“Indaba yokulwa kwabafana bethwalelane amahloka ngiyayazi njalo ngabikela amapholisa kodwa kawazange athatha inyathelo athi azabuya kodwa sokuze kulamuhla engabuyanga.
“Sengize ngibona kungcono ukuthi ngiyebikela induna ngoba abafana laba kukhanya balokhu bedingana ngakho bengaphetha besenza ingozi esigabeni”, kuphetha uMnu Ndlovu. —Ubulembu
Online Reporter