admin
INENGI labantu elizweni liyahlukuluzwa ngoba kalazi amalungelo alo.
Uthola umuntu ehlukuluzwa kodwa ezithulela ethi akunani kukanti umthetho ulakho ukumvikela.
Kudala yebo kwakungadingeki ukuthi abantu bavule amabhuku omthetho ngoba kwakuvele kulokuhloniphana kodwa ngenxa yokuguquka kwezinto inengi labantu selaguquka lalo, selithatha umthetho liwufumbathe ezandleni.
Lokhu sekubangele ukuthi ilizwe libe liguqula imithetho yokujezisa izikliwi ukuze lizame ukuzifundisa ukuhlonipha abanye.
Kuliviki sithanda ukuphathaphatha ngamalungelo omuntu nje.
Uthola ukuthi abantu nxa belixukwana basuka bavuke amadlabuzane bazibone belamandla esilwane.
Lapha-ke basuka bathethise yiloba ngubani ongabe edlula phambi kwabo, bamthethise ngenhlamba kumbe njalo bazame ukumbamba kungela sivumelwano phakathi kwabo lomuntu lo.
Inengi labantu besifazane yilo elandise ukuhlukuluzwa ngalindlela lapho umuntu eyathi ukumsukela amthele ngenkalakatha yenhlamba.
Mhlawumbe athi nxa edlula bambambe isandla uthole esengozama ukuzikhulula ethule andubana asuke lapha azihambele enikina ikhanda.
Lokhu akumelanga kwenzakale, umthetho awukuvumeli ngitsho lakancane ukuthi umuntu athethiswe ngenhlamba kumbe njalo abanjwe ngamandla ukuthi enziwe angakufuniyo.
Kuqakathekile njalo ukuthi abantu laba abandise ukuhlukuluzwa bazi indawo lapha abangayamangala khona njalo bazi umuntu ongabe ebahlukuluzile.
Kungabamnandi ukuthi nxa umuntu ethethiswa ahle atshele umuntu womthetho ongabe edlula eceleni kwakhe ukuthi amncede.
Inengi labantu, ikakhulu abesifazane, sebekuthatha ngokuthi bavele bona bamele bahlukuluzwe kukanti cha umthetho ulakho ukubavikela.
Ngitsho lamadoda uthola ukuthi uyabe esesaba ukudlula kwenye indawo ngoba esazi ukuthi ulakho ukutshiya amazinyo akhe khonale.
Akulamuntu olemvumo yokuhlukuluza omunye umuntu amthathele injabulo kunye lokukhululeka elizweni.
Ngitsho lamankampani elizweni aselomkhuba wokuthi nxa umuntu engasisinothi, usomabhizimusi phela, angaze ancedwa masinyane.
Uthola lezisebenzi zimeyisa umuntu wenkosi athi uma efole elayinini ilanga lonke uma efika phambili atshelwe ukuthi kabuyele endlini ngoba amaphepha akhe engeneli.
Kuthi labo abahlonitshwayo batshelwe ukuthi akunani bazancedwa njalo akumelanga bazihluphe ngokutshona besima elayinini.
Ngitsho phela labo abalemali bayawazi amalungelo abo, kungenxa yalokhu bayahlonitshwa, kukanti umatshayinyoka uyaxotshwa etshelwa ukuthi ubaqedela isikhathi.
Kungakho-ke abantu kumele bavuse amakhanda bangavumeli izikliwi zisenza ezikuthandayo ngoba yizo njalo lezizikliwi ezekelelwayo ezicina zibamba abantu iganyavu.
Kuyamangalisa ukuthi abantu abadla ingwalo yibo abaqhuba lumsebenzi wokuthatha umthetho bawufake ezandleni zabo.
Online Reporter