Online Reporter
INDEBE yoMhlaba kanobhutshuzwayo yalonyaka bekulindeleke ukuthi itshengise ukudlondlobala kwalumdlalo emazweni wonke jikelele kodwa sekuqala ukutshintsha lokho ngenxa yempi ephakathi kwe-Iran, Israel le-United States.
Umqhudelwano lo, ozobanjelwa e-United States, Canada naseMexico, kuhlelwe ukuthi udlalwe ngamaqembu angu-48 okokuqala ngqa kusukela mhlaka 11 Mpandula 11 kusiya ku 19 Ntulikazi.
I-Iran yaba yilizwe lesithathu ukuzibekisela indawo ngoMbimbitho nyakenye, ilandela iJapan leNew Zealand, kodwa lelizwe lisengcupheni yokuthi lingabe lisawudlala uma kuqhubeka ukutshayisana kwalo le-Israel, ebambisene le-United States lamanye amazwe.
Selokhu la mazwe eqalile ukuhlaselana ngempelaviki edlule, kunengi okutshengisa ukuthi kungenzeka iqembu le-Iran lingabe lisalubhanda eNdebeni yoMhlaba, ngokuzikhethela kumbe livinjwe yi-United States.
“Akulula ukukhipha isinqumo esiqondileyo njengamanje kodwa sizoba khona. Kusazohlanganiswa amakhanda ezinsukwini ezizayo ukuze kunqunywe ukuthi kuzokwenzekani. Esingakusho njengamanje yikuthi njengoba kulempi embi kangaka, lincane ithemba esilalo mayelana ngeNdebe yoMhlaba,” kutsho umongameli we-Iran Football Federation, uMehdi Taj, ekhuluma kumabonakude we-IRIB Channel.
I-Iran kufanele iqale lo umqhudelwano kuGroup G lapho iqhathwe khona leNew Zealand, Belgium le-Egypt. Yomithathu imidlalo yamaqoqo kuhlelwe ukuthi iyidlalele e-USA, emibili eCalifornia lowodwa eSeattle.
Uma kungenzeka ukuthi i-Iran ivinjelwe, iFifa kuzamele ithole indlela yokuvala isikhala salo.
Emlandweni wezemidlalo, sekuke kwenzeka ukuthi amazwe akhethe ukuduba imiqhudelwano ngenxa yezizatho zepolitiki njengoba kwenzeka i-Argentina isuswa eNdebeni yoMhlaba yebhola eyayizodlalelwa eBrazil ngo-1950.
Ngo-1976 amazwe ase-Afrika aduba ama-Olympic ayeseMontreal kulandela ukungakhitshwa kweNew Zealand kulumqhudelwano ekubeni iqembu lakhona lombhoxo ladlala eSouth Africa ngalowo mnyaka, ngesikhathi sobandlululo.
Kulomnyaka iqembu lesizwe lekhilikithi eleBangladesh lidube iNdebe yoMhlaba ngenxa yokungazwani le-India esingethe lumqhudelwano ngokubambisana leSri Lanka. Isikhala seBangladesh savalwa yiScotland.
Inhlanganiso emele ibhola emhlabeni, iFifa, ingakwenza lokhu nxa i-Iran ingacina iphumile. Kodwa ngenxa yokuthi ibhola lidume umhlaba wonke, leso sinqumo singasusa umsindo ozwakalayo ongaba lomthelela kubaxhasi balumqhudelwano.
Engxoxweni le-website iPolitico, umongameli we-United States uDonald Trump, uthe akayigqizi qakala eyokuthi i-Iran isazodlala yini eNdebeni yoMhlaba.
“Angilandaba lalokho. Engikwaziyo yikuthi i-Iran iyilizwe eselinqotshiwe, eseliphefumula ngomoya wokucina,” kutsho uTrump.
Umongameli lo ugixatshezwe yiFifa ngendondo entsha ebizwa ngeFifa Peace Prize ngoMpalakazi nyakenye.
Iqembu lesizwe se-Iran, iMelli, selidlale amahlandla ayisithupha eNdebeni yoMhlaba, ngo-1978, 1998, 2006, 2014, 2018 lango-2022. Alikaze lidlule esigabeni samaqoqo.
Liqeqeshwa ngu-Amir Ghalenoei odabuka khona e-Iran. Ukaputeni ngumdlali wasesiswini u-Alireza Jahanbakhsh, owake wagijima kuBrighton and Hove Albion eNgilandi. Usedlalela iFCV Dender esigabeni esiphezulu eBelgium. —Ubulembu
