adminCornelius Luphahla
Izakhamizi zesigabeni seDibudibu eTsholotsho zibambe owangaphansi ngemva kokuba amanye amanina evubane kwaba luthuli ebanga umkhwenyana.
Isiga lesi senzakale ngeSonto kuyonale iviki ngaphansi kukaSobhuku uMkhululi Nyathi lapho uNkosazana Sakhile Mabhena adindane khona loMonica Mathe kwaba luthuli bebanga ukuba umntakaMabhena uLoveness Moyo sethandana lomkhwenyana kaMaMathe uKhaliphani Mhlanga.
UMthunywa uxhumane loNkosazana Sihle Moyo omunye wezakhamizi zakule indawo ochaze ukuthi wayekhona mhla amanina la esilwa.
“UMaMathe watshela uMabhena ukuba akhuze umntanakhe uFiselani atshiyane lomkhwenyana wakhe ngoba uzachithela umntanakhe umuzi.
“Kuthe kunjalo uMabhena wathi uMaMathe engabombuluzela okwadala ukuthi ababili laba bazwane amandla nanko phela uMaMathe wahle wathela uMabhena ngamanzi kanti yayisiwuchithile umuthi inkonyane.
“Kuthe kunjalo kwathutsha umnikazi wendoda uDeliwe wafika wasukela uMabhena okwadala ukuthi silamule,” kutsho uNkszn Moyo.
Kuzwakale njalo ukuthi ngemva kokubhuqana lokhu uLoveness wahle wabaleka ekhaya akwaziwa ukuthi waqonda ngaphi njalo uyadingwa ukuze kuthoniswe indaba le.
Ekhuluma lentatheli uNkszn Monica Mathe uchaze ukuthi yena wayengajonganga ukulwa loMabhena wayembonisa yena wasesilwa.
“Mina ngangingajonganga ukulwa loMabhena kodwa ngangifuna sincedisane sikhuze umntwana engachitheli omunye umuzi yena wasengithethisa yikho okwangicaphulayo ngasengimtshaya,” kuchaza uNkszn Mabhena.
Ekhuluma loMthunywa uNkosikazi Deliwe Mhlanga uchaze ukuthi yena ubuhlungu ngokuthathelwa kwakhe indoda yikho watshaya uMabhena.
“Mina ngacatshulwa yikuthi uMabhena wayekwazi ukuthi umntanakhe ufuna ukungichithela umuzi kodwa ethi nxa etshelwa ukuba amkhuze yena akhulume kubi,” kutsho uNkskz Mhlanga.
Imizamo yokukhulumisana loNkosazana Mabhena kanye loMnu Mhlanga yehlule ngoba incingo zabo bezingangeni.
Online Reporter