adminSilo Ophezulu Stinta
SISAQHUBEKA lodaba lwethu phakathi kukaNgonyama lonkosikazi wakhe owayethanda ukuzikholisisa okwedlula ukuba linina lekhaya. Kwathi uNgonyama eselungisele uKhotso okokubamba ithumbu wasukuma uKhotso ebonga ukudla ayekuphiwe okuyinto eyayichaza ukuthi wayefundiswe ngenhlonipho. UNgonyama wayengakaze azwe abakhe abantwana bebonga ukudla lokhu ababekuphiwa.
Wayefisa lokuyigezisa imiganu le waze wenqatshelwa nguNgonyama, loba nje wazama uKhotso ukuthi amchazele ukuthi yena nguye owayegezisa ngakibo. Lapho uMaMsie wamkhalimela okwezulu esithi kabeke phansi izitsha zakhe engakazibulali.
UMaMsie wayengakunanzeleli ukuthi umntwana ufuna ukusiza ngenhliziyo yakhe yonke. UNgonyama wamtshengisa lapho okugeziselwa khona izitsha wazigezisa, wazesula.
Emva kokugezisa izitsha uNgonyama wamngenisa lapho okugezelwa khona wamgezisa yena ngokwakhe wamkhuhla intamo le eyayikhanya isilebhanti lengcekeza. Wathi eqeda nje ukumgezisa uMaMsie wayesemile emnyango lapha lengilazi yotshwala obutshisayo. Wayesebone kungcono ukuthi azilibazise esekhaya njengoba umyeni wayengayingeni eyokuya koZat.
Wabuza ngelontelayo uMaMsie ukuthi lowo mntwana wayezalala ngaphi, kwakhona eqala ukubuza ukuthi yinindaba uNgonyama ebuya lomntwana lapha ekhaya engamazisanga. Wayebuza sengathi ngumuntu okhathalelayo kukanti wayentela nje. Ngenhliziyo embi wayesevele wakhiya izindlu zabantwana bakhe zonke ngelithi wayengeke avumele uKhotso ayelala kuzo atshiye isikhwehlela sakhe esizacina sesigulisa abantwana bakhe.
UNgonyama wayevele esekhethe ukuthula njengoba wayesezitshayelwa likhanda engazimiselanga ukukhuluma loMaMsie. Wakhetha nje ukuyalalisa uKhotso endlini yokuphumulela. Lapho uMaMsie watshinga wadla amalahle ngelithi indlu yokuphumulela yayizathelelwa nguKhotso inuke ithi phu.
Wayekhuluma engathuli uMaMsie uNgonyama waze wamdonsa ngengalo wamhambisa endlini yabo yokulala. Lapho-ke wafika wamkhalimela ngelengwenyama ukuthi nxa elokhu eqhubekela phambili ebanga umsindo wayesezamvusa umhlonga. Ngendlela amsunduzela ngayo phezu kombheda waze wachitha ingilazi yakhe yotshwala, kwahle kwacaca ukuthi wayesezondile njalo wayengenza loba yini eyokuchumisa uMaMsie.
Wayesezondile esegane unwabu lapho uNgonyama.
Online Reporter