Ukwakhiwa kwesinciphiso kuyaqhutshwa

LAPHA siqhubeka sikhangela ukwakhiwa kwesinciphiso kumabizo alondebembili kumbe unsinini elungeni lokucina.

Lowo ndebembili kumbe unsinini uguquka abe ngulwangeni anduba kujotshelelwe isijobelelo sesinciphiso u-ana ngemva kokususa unkamisa wokucina webizo.

Sikutshengisile lokhu kuviki ephelileyo ngezibonelo ezimbalwa.

Siqala khona lapha sitshengisa inguquko yabondebembili labonsinini besiba ngolwangeni:

Ondebembili                Olwangeni

b(inkabi)                        tsh (inkatshana)

m(intamo)                     ny (intanyana)

mb(imbambo)              nj (imbanjana)

mp(imompi)                 ntsh (impontshana)

Unkamisa wokucina webizo uyasuswa indawo yakhe ithathwe yisijobelelo sesinciphiso u-ana. Kubizo /inkabi/ undebembili /b/ oselungeni lokucina uyaguquka abengulwangeni /tsh/. Unkamisa /i/ osekucineni uyasuswa indawo yakhe ithathwe yisijobelelo sesinciphiso u/-ana/.

Onsinini                                                                              Olwangeni

d(idada)                                       >                                      (idajana)

nd(inqindi)                                  >                                      (inqinjana)

th(umuthi)                                  >                                       (umutshana)

nt(umkhonto)                             >                                       (umkhontshwana)

n(umkhono)                               >                                       (umkhonywana)

Okumele sikunanzelele yikuthi ondebembili kabangwaqazisi nxa besiba yizinciphiso noma ngabe amabizo akhona acina ngo –o kumbe –u.

Akhona amabizo alabondebezinyo f lo v elungeni lokucina. Wona kawangwaqazisi unkamisa wokucina angazabe ngu –o loba –u, kodwa amane amsuse lowonkamisa wokucina abesejobelela isijobelelo sesinciphiso u –ana.

Nanzi izibonelo: isifo > isifana – isif(o) + ana > isifana; imvu > imvana – imv(u) + ana > imvana; isifu > isifana – isif(u) + ana > isifana.