Online Reporter
Faith Ndlovu
KULEMULI yakuleli ehlala eSouth Africa edinga usizo lwemali engange-R2.5 miliyoni yokuthi kutshitshwe isibindi somntanayo oleminyaka engu-15 yokuzalwa.
Kubikwa umntwana lo ulomkhuhlane we-Autoimmune Hepatitis, okuyisimo esingajwayelekanga esihlasela isibindi, odala i-liver cirrhosis.
Okwakhathesi usesibhedlela seCharlotte Maxeke Johannesburg Academic Hospital, lapho odokotela asebetshele abazali bakhe ukuthi uzasila nxa engathola esinye isibindi.
Ngokubika kukamama womntwana, uVuyelwa Ncube, ukuthola isibindi lezinye indleko zokwelatshwa kubizwa iR2.5 million. Lokhu kubalisela indleko ezikhona kungakatshintshwa isibindi lokuhlolwa ngodokotela, iR250 000, ukulaliswa esibhedlela lokusikwa (R1 500 000), ukwelatshwa ngemva kokusikwa (R500 000) lokuthola indawo yokuhlala lokuhamba (R250 000).
“Njengemuli senza konke okusemandleni ethu kodwa indingeko yemali ingumthwalo omkhulu. Ngokuzithoba, sicela usekelo olungaba ngolwemali kumbe ukwelaphisa umntwana. Okunye njalo, ukusabalalisa udaba lwethu kungaphathisa ekuthini sifinyelele abantu abanengi,” kutsho uNcube.
Wengeze ngokuthi abezempilakahle abafuna ukuphathisa bamulekile.
“Nxa uyisisebenzi sezempilakahle kumbe inhlanganiso efuna ukusiza singakujabulela lokhu. Sifuna loba yini engasiphathisa ukuze sinikeze umntanethu elinye ithuba empilweni.
Uhlelo lokuhlanganisa imali edingwayo seluqalile ekhasini lobulembu elingaphansi:
www.backabuddy.co.za/campaign/help-vanessa-get-a-life-saving-liver-transplant
