Online Reporter
Nkosilathi Sibanda
UMPHATHINTAMBO obona ngokwenzakala esabelweni sakoBulawayo uJudith Ncube ubeke amazwi enduduzo kumuli yakoKunzekweguta kulandela ukwedlula emhlabeni kukaNkosikazi Constance Kunzekweguta.
Umuyi obengunkosikazi kasomambhisimuzi omkhulu koBulawayo, uMnumzana Clemence Kunzekweguta, otshiye umhlaba ngoLwesibili ngeviki edluleyo esibhedlela seMater Dei.
Wazalwa mhlaka 1 Ncwabakazi 1963. Ubekwe ngoMvulo emathuneni eLady Stanley koBulawayo.
Umphathintambo uNcube wethule ngokuzimisela kukamuyi ekuphakamiseni umphakathi wakoBulawayo.
“Ngibeka amazwi enduduzo kumuli yakoKunzekweguta, izihlobo zonke lebandla leRoman Catholic Church, uBulawayo wonke lelizwe jikelele. Silahlekelwe ngumama wesizwe. Lapha koBulawayo ubengumama obesukumela phezulu kunhlelo zebandla lasemphakathini. Ubehlanganisa abantu, esibutha, elothando lokusebenzela abantu. Silahlekelwe.
“Ngithanda ukuqinisa ubaba uKunzekweguta labantwana. Ubaba uKunzekweguta ngusomabhizimusi esimhlonipha kakhulu. Bobabili lomama basebenze okuzwayo lapha koBulawayo, bayizindonga ezibambe, zavikela umphakathi,” kutsho uMphathintambo uNcube.
Umphathintambo wozokwenzakala esabelweni seMatabeleland North uRichard Moyo uthe: “Siduduza imuli kababa uClemence Kunzekweguta. Sikhala ndawonye lemuli ngoba isizwe silahlekelwe.”
Kubuthene abantu abavela endaweni ezitshiyeneyo, bezovalelisa umuyi ngoMvulo. Inkonzo yokuvalelisa ikhokhelwe libandla leRoman Catholic Church, liqondiswa ngu-Archbishop Alex Thomas labanye. Bekulezihlobo, abangane, amakholwa, izikhulu zekhansili labosaziwayo kumabhizimusi, ezepolikiti, abezempilakahle, ezemidlalo labaphathi bezikolo.
Izikhulumi zibabaze imisebenzi kamuyi, kwathi umkakhe uMnu uKunzekweguta wethule inkondlo, ebonga uthando lokuzehlisa kwesithandwa sakhe.
“Ukuzibutha kwakho, lokuzithoba kwathatha inhliziyo yami. Kawubulahlanga ubuntu bakho engibubone ngelanga lokuqala, ngibubone kwaze kwaba lilanga lokucina.
“Nangu umalukazana kamama wami. Ngayibona intombi elesizotha, lobumnene njalo elobuntu,” nguMnu Kunzekweguta kunkondlo yakhe.
Umuyi lomkakhe baziwa kakhulu njengabaphathi benkampani yeZero Suppliers leKunzekweguta Enterprises.
UNkkz Kunzekweguta ubengusaziwayo njalo ehlonitshwa ngokuphathisa kumisebenzi yokuphakamisa uzulu labantwana koBulawayo. Ubelilunga lebandla leRoman Catholic Church, eLady of Lourdes, eKhumalo lapho akade eyingxenye yokuncedisa abaswelayo ngendlela ezitshiyeneyo.
Edolobheni lakoBulawayo, ubelilunga lekomithi ebiqoqa imbuthano yokuthakazela iKhisimusi eCentenary Park, Nketa Park lakwezinye indawo.
