adminYiNtatheli kaMthunywa
KULEMULI ehlala elokitshini leCowdray Park, koBulawayo esele ikhuza umhlola ngemva kokuba ithunjwe ngamasela angena layo iganga ngemota afika adlova umfazi.
Isiga lesi senzakale mhlaka 6 Nhlangula ngesikhathi imuli le evezwe ngokuthi ngeyakoNyoni ivela edilini lokuzalwa komngane wayo.
Kubikwa uMnumzana Nyoni (64) lomkakhe bathunjwa ngehola lika-11 ebusuku.
UNkosikazi Nyoni uchazele uMthunywa ukuba lokhe emadolonzima ngesiga esabehlelayo lomkakhe.
“Sasivela edilini lokuzalwa kwesinye isihlobo sami. Sathi sesiphenduka safika savula intuba. Ngesikhathi sisavula isango amasela la adumela umkami ambopha izandla ngentambo yezicathulo.
“Esebotshiwe bamfaka emoteni bangihlubula izembatho zami. Basebetshayela imota bahamba lathi egangeni leNgozi Mine. Sesisegangeni batshiya umkami emoteni, basebesehla lami.
“Bangibuza ukuba imali ingaphi andubana bangidlove bonke bobabili. Ngesikhathi bengibamba iganyavu umkami wenelisa ukuzikhulula wabaleka ngemota waya emapholiseni ukuze ayedinga usizo,” kulandisa uNkkz Nyoni.
UNkkz Nyoni uqhubekele phambili wathi sebeqede ukumdlova bamtshiya kuleloganga.
“Sebeqedile ukungidlova bangincenga befuna ukuhamba lami mina ngala ngoba ngisazi ukuthi bazaphinda bangihlukuluze Umkami wabuya lamapholisa bona bevele sebetshaye utshani.
“Bangithathela imali engange-$40, amajesi amabili lomakhalekhukhwini. Ngagijinyiselwa esibhedlela seMpilo ukuyahlolwa udokotela wafika wathi akukhanyi ukuba ngadlovwa ngoba kangilimalanga.
“Lokhu kungizwisa ubuhlungu ngoba abantu laba balala lami ngingafuni,” kuchaza uNkkz Nyoni.
Isikhulumi samapholisa sakoBulawayo uInspector Mandlenkosi Moyo uthe sebewamukele umbiko lo.
“Udaba lwemuli yeCowdray Park ethunjwe yizigebengu andubana zibambe owesifazane iganyavu silwamukele sisadinga abantu abenze lokhu,” kuchaza uInsp Moyo.
Online Reporter