admin
Msilisi Dube
KULOMFUNDISI webandla leGathering of Saints koBulawayo omangalelwe ngumkakhe emthethwandaba ethi umthwalise amagabha avuzayo nanko phela umtshaya nsukuzonke qede amthathele lempahla zokugqoka.
Umfundisi lo ongumsolwa uBusani Masuku okungasatholakalanga iminyaka yakhe yokuzalwa kubikwa ubehlala ehlukumeza umkakhe njalo engumamangala uMerita Khumalo ngokumtshaya okucine kubangela ukuba ayecela i-Protection Order emthethwandaba weWestern Commonage.
Kubikwa phakathi kwenyanga ephelileyo umsolwa ubethi engafika evela emsebenzini afike atshaye umkakhe abuye amthethise ngenkalakatha zenhlamba kungelasizatho esibambekayo.
Kubuye kwezwakala ukuba umsolwa ubevame ukuthumela abangane bakhe izithombe zikamamangala ngaphandle kwemvumo yakhe.
Kubikwa mhlaka 8 kuyonale inyanga umsolwa wathethisa umamangala phambi kwabangane bakhe okwacina kubangela ukuba ayebika udaba emapholiseni.
Umamangala ucele ukuba umsolwa aphiwe i-Protection Order ngoba emhlukumeza emoyeni njalo emyangisa phambi kwabangane bakhe kunye lezihlobo zakhe.
Umamangala ubhale i-affidavit echaza ukuba umkakhe, ungumfundisi kodwa izenzo zakhe azitshengisi ukuba ngumfundisi nanko phela wayethi engezwa efuna ukumtshaya kumbe ukumthethisa akwenze santando.
Icala leli lizathonisiswa phambi kukamantshi uNkosikazi Tancy Dube mhlaka 15 kuyonale inyanga.
Online Reporter