Online Reporter
Nkosilathi Sibanda
AMALUNGA emuli yakoMoyo, ehlala e-Old Magwegwe koBulawayo eyatshaywa yinkosazana asebike ukuba asethole uncedo komunye usiyazi eGokwe.
Imuli le yehlelwa yisiga sokutshitshilizwa yinkosazana ngesikhathi kusina izulu, kwenye imini ngoNhlolanja.
Inkosazana yahlasela amalunga amane alimuli agoqela inina lomuzi uNkosazana Sihle Ngwenya umntanakhe u-Anna Nkomo lomunye umntwana oyisihlobo sabo, lomkakhe uMnumzana Mbonisi Moyo.
Abathathu basala bekhalaza ngokuzwa ubuhlungu emzimbeni njalo ngaleso sikhathi bazama ukuthola ukwelatshwa esibhedlela kwehlula ngoba abezempilakahle babebanika amaphilisi okuqeda ubuhlungu kuphela.
Bazama ukubhoda kubosiyazi abathile, bathola omunye owathi kumele babhadale ngenkomo ukuze belatshwe kuphinde kuhlanzwe iguma, kukhitshwe “amaqanda” atshiywe yinkosikazi le.
Ngemva kwamaviki amabili ibhoda, imuli le icine ithola uncedo, ngokutsho kwenina lomuzi, uNkosazana Sihle Ngwenya.
UNkszn Ngwenya utshele iphephandaba likazulu ukuthi basukumela phezulu bayafika esiqintini seBomba eGokwe, enkabazwe yelizwe.
Yikho lapho okuvela khona uNkszn Ngwenya.
“Sacina sithole ukuncediswa ngomunye ubaba okuthiwa nguSibanda. Wasebenza sibili ngokuchela ekhipha lamaqanda ombane egumeni. Akula esikhala ngakho khathesi.
“Siyabonga kubaba uSibanda ngokuzinikela kwakhe ukuthi selatshwe, kulungiswe leguma lethu lapho okwedlula umbane,” nguNkszn Ngwenya lo.
Kazange afune ukuthi atsho okunengi ngokwenziwa ngusiyazi, eqina ngokuthi ngeke akutsho ecingweni.
Anduba bagijimele eGokwe, imuli le yathola isicebiso nguMnumzana Mhabhinyana Ngwenya, omelet osiyazi koBulawayo owathi isehlakalo lesi “silokukhuluma” phakathi ngakho kudingeka ukuthi imuli le isukume.
Omunye wabosiyazi owathintwa zintatheli, uGogo uMalinga wathi: “Nxa batshaywa ngumbane bangabi lamanxeba abonakalayo, bayabe bahabula. Badinga ukuthi basentshenzwe bathole izihlahla zokunatha belatshwe ngaphakathi.
Inkosazana iyakhuluma. Kukhona okuyabe sekwenzakele okudinga ukuba imuli iphakame iyekuzwa ukuba kuhamba njani.”
Kulokholo esiNtwini lokuthi nxa inkosazana ingatshaya endaweni ethile, kuvame ukuthi iphinde futhi. Abadala bathi iyabe itshiye amaqanda.
