Sukulwenkosi Dube-Matutu
KULEMULI ezimbili zeGwanda ezilahlekelwe yimpahla yazo kanye lezinye izinto eziqakathekileyo ngemva kokuba kulumathe umlilo endlini obangelwe yikudubuka kwegasi.
Imuli lezi ezimbili, bezihlala ndawonye endlini eyodwa eJacaranda Extension, edolobheni leGwanda.
Isiga lesi senzakale ngoMvulo ngezikhathi zabo-8 ntambama.
UNkosazana Ntandoyenkosi Moyo, ohlala labantwabakhe abathathu kanye lomzukulu oleminyaka emibili yokuzalwa, uthe behlulekile ukuhlenga loba yiphi impahla yabo ngesikhathi kuvutha umlilo.
Khathesi imuli lezi zihlala komakhelwane, ababanike indawo yokuhlala ngesikhathi besadinga ukuthi benze njani.
“Ngihlala labantwana bami abathathu kanye lomzukulu wami. Bekulemuli yomzawami layo ebisebenzisa ingxenye yendlu le. Leyomuli ibikhangelwa nguntombazana osebenzayo oleminyaka engu-20, onakekela abantwana abahlanu abaleminyaka ephakathi kweyisificamunwemunye lengu-16.
“Ngangihlezi phandle labantwana ngezikhathi zabo-8 ntambama, untombazana lo osebenzayo wayesendlini labanye abantwana bepheka besebenzisa isitofu segasi. Kwezwakala ukuqhuma endlini baphuma begijima. Okuhle yikuthi kakho owalimalayo,” kutsho uNkszn Moyo. UNkszn Moyo uthe i-regulator yegasi eyayixhunywe esitofini yaphuma kumpompi isitofu sisebenza okuyikho okwabangela ukuthi kuqhamuke umlilo.
Uthe umlilo utshabalalise impahla yabo yonke, okugoqela impahla yendlini, izigqoko, izincwadi eziqakathekileyo, imali kanye lezinye izinto.
Ukhansila kule iWadi uKnowledge Ndlovu uqinisekise ukuthi kwenzakele umonakalo lo. Uthe waziswe ngomunye umakhelwane ngesiga lesi, wasebiza izicitshamlilo.
UNdlovu uthe kulemizamo eyenziwayo yokuncedisa imuli lezi ezilahlekelweyo.
Uthe bonke abafisa ukuncedisa ngemali bangathumela ku-Ecocash kaMnumzana Evidence Nyathi kunombolo ezithi 0778 462 881.
UMgcinisihlalo weGwanda District Civil Protection Committee, uNkosazana Nomathemba Ndlovu, uthe ikhomithi ebona ngezokulondolozwa kwabantu ngesikhathi sezehlakalo ezinje isisenza umsebenzi wayo ukuze ibone ubukhulu bomonakalo kunye lokuthi imuli lezi zingancediswa njani.
