YiNtatheli kaMthunywa
BASELE bethithibele abantu emngcwabeni wendoda eleminyaka engu-26 yokuzalwa eHauna ngemva kokuba bebone imbedumehlwana nanko isidumbu sikamuyi besiwohloka inyembezi emehlweni ngesikhathi elele ebhokisini, kwathi ngosuku olulandelayo kwatholakala ingcwaba liphambanisekile.
UWalter Kupemba (Jnr) ungcwatshwe ngoLwesihlanu olwedluleyo ngemva kokutshona elaliswe esibhedlela seVictoria Chitepo Provincial Hospital ngoLwesithathu.
Unina, uGladys Tangwena, uthe imuli lokhe ingakakwamukeli ukufa kwendodana yakhe kanye lezigigaba ezenzakala emngcwabeni.
UTangwena uthe waqala wezwa ngezisebenzi zemotsha ukuthi isidumbu sendodana yakhe sehla inyembezi.
Uthe laye wazibonela ngokwakhe ngemva kokuba ibhokisi selivuliwe.
“Besula inyembezi lezo, kodwa kwathi ngokuhamba kwesikhathi mina labodadewethu senza eminye imikhuba yesintu eyenziwa ngunina kamufi, inyembezi zaqalisa futhi ukugeleza.
“Kwakungasi mathonsi nje ambalwa. Kwakukhanya angathi uyakhala, ikakhulu elihlweni lesandleni sakhe sokudla. Kwakungathi uyaphila njalo uyakhala. Ngadabuka kakhulu ngaze ngehluleka ukuphinda ngimvalelise ngokumbona,” kutsho yena.
UTangwena uthe abanye ababesemngcwabeni labo bakubona lokhu.
“Ekucineni samngcwaba inyembezi zilokhu zibonakala. Kwakuyinto engazwisisekiyo,” kutsho inina leli.
Kodwa-ke, usizi lwemuli lwakhula kakhulu ngosuku olulandelayo ekuseni lapho sebeyehlola ingcwaba, okungumkhuba wesintu owenziwayo.
UTangwena uthe bafica kungathi kulenyawo ezingajayelekanga phezu kwengcwaba.
“Kwakulophawu engxenyeni ephezulu yethuna olwalukhanya angathi kulomuntu owayehlezi khona.
Saphinda sabona inyawo zisuka ethuneni zisiya khatshana. “Ezinye zazikhanya njengezomuntu, kodwa ezinye zifanana lezesifuyo,” kutsho yena.
Wengezelele esithi ilitshe elalibekwe emakhanda engcwabeni lalikhutshiwe.
Echaza ngendodana yakhe, uTangwena uthe uWalter wayeyindoda ekhutheleyo njalo elamaphupho amahle, esithi ukufa kwakhe kutshiye imuli yethukile. UWalter Jnr wayesebenza eSagambe njalo wayeseqalile ukwakha indlu elamakamelo ayisikhombisa ngesikhathi esedlula emhlabeni.
“Besingakhangelelanga ukuthi engahamba ngendlela enje,” utshilo.
UTangwena uthe indodana yakhe yabuyela ekhaya ivela eSagambe ikhala ngobuhlungu bezinyo, kodwa impilakahle yayo yaphanga yabambi kakhulu.
“Intamo yakhe yaqalisa ukuvuvuka njalo ekucineni wacina esehluleka ukukhuluma. Wathi eselaliswe eVictoria Chitepo Provincial Hospital wayesekhuluma esebenzisa izandla.
“Kwakubuhlungu ukumbona egula,” kutsho yena.
UTangwena osesele lamadodakazi amabili kuphela, uthe usevalweni ngokuphepha kwemuli yakhe ngenxa yezinto ezingazwisisekiyo ezenzakala ngemva kokufa kwendodana yakhe.
Uveze ukuthi imuli yakhe yacabanga ukudinga usizo kubosiyazi ngalokho okwenzakalayo.
UTangwena uphinde wathi indodana yakhe yayike yaxabana lomunye waboyise, athi wayeyethusele.
“Angikwazi ukuthi kwenzakalani endodaneni yami lokuthi kungani izinto lezi ezingajayelekanga zisenzakala esefile. Kwezinye izikhathi ngize ngicabange ngokutshiya ikhaya lami lamadodakazi ami ngoba sengisesaba,” kutsho yena.
Uyise omdala, uWalter Kupemba (Snr), uqinisekisile ukuthi izihlobo kanye labantu bomphakathi babona okwakukhanya kuzinyembezi zisehla emehlweni esidumbu ngesikhathi somngcwabo.
“Ngangingakaze ngibone into enje empilweni yami. Sonke sasethukile.
“Thina njengemuli sifuna ukuzwisisa okwenzakalayo lokuthi kuyini okwabangela ukufa kwakhe,” kutsho yena.
UKupemba uthe imuli isiqalisile ukudingisisa kubosiyazi ukuze ithole impendulo, njalo kulomunye okhangelelwe ukuthi afike emzini wabo.
“Sesike saya komunye usiyazi njalo sikhangelele ukuthi afike emzini wethu azosincedisa ukuthola ukuthi kungabe kwenzakalani. UWalter wayephiwe ibizo lami, ngakho ukufa kwakhe kungizwise ubuhlungu kakhulu. Ngizakwenza konke okusemandleni ami ukuze sithole iqiniso,” kutsho yena.
Uphinde waqinisekisa ukuthi laye wazibona impawu ezingajayelekanga ezazisethuneni.
“Kwasethusa kakhulu ukufica izimpawu ezazikhanya angathi kulomuntu owayehlezi phezu kwethuna elalisanda kugqitshelwa. Saphinda sabona inyawo ezazisuka lapho zingena indlela.
Sifuna ukuthola ukuthi kwenzakalani khona kanye,” kutsho yena. UKupemba uthe imuli iphinde yahlela ukuya eSagambe ukuyadingisisa ukuthi uWalter Jnr wayeke wahlangana lezinkinga kumbe izingxabano yini engakaguli.
