Innocent Kurira
UJOEL Luphahla kulimpelaviki ubuyela eBarbourfields, enkundleni ayijwayeleyo njalo usefunge ukuthi iqembu lakhe le-TelOne lizayinqoba iHighlanders kumdlalo weligi yeCastle Lager.
Loba i-TelOne isikhangelele ukususwa kuPremier Soccer League, uLuphahla uthe ulolonga iqembu elizadanisa “ithimu yezwe lonke” ngeSonto.
ITelOne yanqoba emdlalweni wokuqala wamaqembu la.
ULuphahla, owake wadlalela waphinda waqeqetsha iHighlanders uzabe efuna ukuphazamisa icebo leqembu lakhe lakudala lokuqeda isizini lisesimeni esihle ngokutshaya amaqembu amakhulu.
KuLuphahla, umdlalo lo uqakatheke kakhulu ngoba wake wayisebenzela iBosso, ngakho uzafuna ukutshengisa ukuthi ulakho ukuyidanisa.
Lanxa kunjalo, ubungane lothando alalo ngeqembu leli kuzamele kubekwe eceleni nxa amaqembu la esebhekene.
Umqeqetshi weTelOne lo uzimisele ukuqinisekisa ukuthi ukwehlela kuDivision One akuphambanisi imizamo yeqembu lakhe yokuqeda imidlalo yePSL ngesithunzi.
Isiphetho seTelOne sesisaziwa, njengoba iqembu selilahlekelwe yindawo yalo kuPSL. Lanxa kunjalo, uLuphahla uthe abadlali bakhe baseselokuthile abangakulwela njengoba befuna ukuvala isizini ngendlela ehloniphekayo.
“Sifuna ukuqeda isizini kuhle lanxa sesehlele kuDivision One. Ngilindele umdlalo omuhle webhola kumaqembu womabili. Kuhle ukuhlala ngibuyela koBulawayo ngizohlangana leHighlanders, iqembu engake ngalidlalela njalo ngaliqeqetsha.
“Ngiyalihlonipha kakhulu iqembu leli njalo ngiyazwisisa ukuthi litshoni ebantwini bakoBulawayo. Lanxa kunjalo, ibhola limayelana lokuncintisana. Sifuna ukuqeda isizini siphakamise amakhanda ethu lanxa izinto zingasihambelanga kuhle,” kutsho uLuphahla.
Amazwi kaLuphahla aveza ubunzima obubhekane leTelOne, okumele ithole amandla okuqhubeka ilwela impumela enhle lanxa isizini yayo ibingaqhubi kuhle.
KuTelOne, ukunqoba kumbe ukuthola impumela enhle ibhekane leqembu elikhulu njengeBosso kungayiduduza ngemva kwesizini enzima.
Kodwa kuHighlanders, ukulahlekelwa yimiklomelo ibhekane leqembu eselivele lehlele kuDivision One kungangezelela ukudana okukhulu, nanko layo kayizange idlale kuhle. Ukubuya
kukaLuphahla koBulawayo kuza lemizwa etshiyeneyo, kodwa abaqeqetshi bamaqembu womabili bazabe bekhangele kakhulu impumela yomdlalo.
Imidlalo kuPSL kulimpelaviki:
\NgoMgqibelo: ZPC Kariba v CAPS United (Nyamhunga Stadium), FC Platinum v Triangle United (Mandava Stadium), MWOS v Ngezi Platinum Stars (Ngoni Stadium), Bulawayo Chiefs v FC Hunters (Luveve Stadium), Chicken Inn v Agama (Barbourfields Stadium), Scottland v Herentals College (Rufaro Stadium), Simba Bhora v Hardrock (Wadzanayi Stadium).
NgeSonto: Highlanders v TelOne (Barbourfields Stadium)
