admin
YiNtatheli kaMthunywa
INANI labantu abalokhu belomkhuhlane weCovid-19 elizweni selehle laya ngaphansi kwenkulungwane okungokokuqala kuyonale inyanga.
Kusukela kunyanga eyedluleyo, inani labantu abale-Covid 19 belikhuphuka ngesiqubu esimangalisayo kulandela ukwanda kwabantu abathelelana lumkhuhlane kuzigaba.
Ugatsha olubona ngezempilakahle kanye lokondliwa kuhle kwabantwana lukhiphe umbiko othi kusukela ngeSonto inani labantu abale-Covid-19 lehle laya ku-900.
NgeSonto, kubikwe ukuba kulabantu abangu-37 abatholakale belegcikwane leli kwabhubha ababili ngenxa yalumkhuhlane esabelweni seManicaland okwenza inani labantu asebedlula emhlabeni kubangelwa ngumkhuhlane lo laya ku-155.
“Kusukela mhlaka 23 Ncwabakazi, ilizwe leZimbabwe libhalise abantu abangu- 5 930 abalalumkhuhlane, abangu-4 872 basila kanye lababili abedlule emhlabeni,” kutsho incwadi esuka kugatsha lwezempilakahle.
Incwadi le iqhubekele phambili yaveza ukuthi phakathi kwalabo abatholakale belegcikwane leli isilinganiso esingange 54, 96 phesenti ngabesilisa kukanti i-45,04 phesenti ngabesifazane.
Ucwaningo olutsha luveze ukuthi ukubhema igwayi yikho okubangela ukuthi amadoda amanengi abambe lumkhuhlane nanko phela elizweni kulabobaba abanengi ababhemayo.
Ugatsha lwezempilakahle lubike njalo ukuba abantu kumele baqhubeke begqoka izaheke (masks), bangasondelelani kanye lokuhlala ezindlini ukuze kuvikelwe ukumememetheka kwalumkhuhlane.
Ilizwe leZimbabwe, njengomhlaba wonke nje, lingaphansi kokuvinjwa kokuhamba hamba kwabantu mahlayana njenjengemizamo yokuvikela ukumemetheka kwalumkhuhlane osuhlasele izigidi zabantu wabulala izinkulungwane.
Online Reporter