admin
Ethel Ncube
KULANDELA ukubekwa komthetho wokuba abantwana abazithwala besesikolo baqhubeke ngezifundo zabo nguHulumende abazali bendaweni ezehlukeneyo elizweni sebeveze imibono etshiyeneyo ngalumthetho.
UMthunywa uxoxisane lomunye umzali oseGwanda uNkosazana Maphiliso Ndlovu oveze ukuthi umthetho lo ngumthetho omuhle.
“Umthetho omutsha usenza sibe lemizwa etshiyeneyo. Ngakolunye uhlangothi ngiwubona umuhle kakhulu ngoba umntwana oyintombazana ubehlezi ecindezelwa nxa esethe wonakala.
“Ijaha belisiba lakho ukuqhubeka kukanti umntwana oyintombazana besekumele ahlale phansi sengathi uphambanise yedwa. Endaweni yakithi banengi abantwana akade becina besehluleka ukuqeda izifundo zabo ngoba sebezithwele.
“Ngikhuluma nje ngenxa ye-lockdown ekhona banengi futhi asebezithwele kubangelwa yikuswela okokwenza obekusitsho ukuba sebezahlala ngekhaya,” kulandisa uNkszn Ndlovu.
Uqhubekele phambili esithi ukubekwa komthetho lo sokuzenza amankazana lawo enelise ukuqhubeka ngezifundo zabo.
“Umthetho lo usuzakwenza amankazana amanengi enelise ukuthi afunde lawo enelise ukuziphilisa.
“Loba umthetho lo umuhle, asazi kumbe bona abantwana bazakwenelisa ukukumela ukuya esikolo bezithwele ngoba abantwana njengoba sibazi balakho ukuhleka lo osezithwele acine esehluleka ukugxila kuzifundo,” kutsho uNkszn Ndlovu.
UMthunywa ubuye waxhumana loMnumzana Kukhanya Moyo oveze ukuba umthetho lo liso elihle.
“Imfundo yilifa umuntu angeke akuthathela lona, njalo imfundo ilakho ukuphilisa umntwana impilo engcono kwelakusasa. Kuhle ngempela ukuthi uHulumende usekubonile ukuba abantwana abangamankazana bebecina beliswela ilifa leli elimqoka ngokubeka umthetho lo,” kutsho uMnu Moyo.
Intatheli ibuye yaxhumana loThubelihle Moyo ochaze ukuba umthetho lo uzaguqula impilo zamantombazana.
“Abantwana abanengi bebelahlekelwa lithuba lokuthola imfundo ngokwenza amaphutha okuya emacansini bacine bezithwele. Umthetho lo usuzakwenza ukuthi lanxa umntwana enze iphutha wazithwala enelise ukuqhubekela phambili ngemfundo yakhe njalo aqondise amaphutha akhe,’’ kuphetha uNkszn Moyo.
Online Reporter