UMTHUNYWA

Izulu lesiphepho libhidliza isikolo lekilinika eBinga

Nkosilathi Sibanda

IZULU elilesiphepho esilandelwe ngumoya omkhulu libhidlize isikolo seChinego Secondary lekilinika esigabeni seBinga South ngoMgqibelo, osekutshiye abafundi lomphakathi jikelele wakulindawo usebunzimeni.

Abafakazi abaqotho abachathekele uMthunywa ngalesisehlakalo bathe isiphepho lesi sihlasele mhlaka 14 Lwezi 2026, ngesikhathi sehola lesine ntambama, satshiya isikolo silomonakalo omkhulu ngemva kokuba umoya uphakamise uphahla lwenye ikilasi.

Kubikwa izulu liphinde labhidliza lama-solar panel ayisithupha adonsa amandla amagetsi afika-3.6kv.

“Amanzi angene ezakhiweni zesikolo konakala amaphepha okuhlela umsebenzi wababalisi, amarekhodi esikolo, ingwalo zokufunda lamaphepha aqakathekileyo okuphatha isikolo.

“Phakathi kwamaphepha awonakalayo kubalwa imizuzu yemihlangano yeSchool Development Committee (SDC) ephathelane lezimali,” kutsho omunye wabafakazi laba osebenza kolunye ugatsha lukaHulumende eBinga.

Uthe umonakalo lo kawucinanga esikolo kuphela ngoba leChinego Clinic lakho konakele.
Isehlakalo lesi sethese umphakathi weChinego umthwalo omkhulu njengoba isikolo lekilinika kuyizakhiwo eziqakathekileyo eziphathisa abantu ngemfundo lezempilakahle.

Kusenjalo, ingatsha ezibona ngemisebenzi kazulu kuHulumende, ikhansili yeBinga lenhlanganiso ezizimele zodwa ziphakathi kwemihlangano yokudinga usizo olugcweleyo lokuphathisa abantu.

Ekhuluma ngamafitshane ngaloludaba, uMphathintambo obona ngokwenzakala esabelweni seMatabeleland North uRichard Moyo uthe uzwile ngomonakalo njalo bazethula umbiko okugcweleyo ngokuhamba kwesikhathi.

“Kusaqhutshwa imihlangano ngalokhu phakathi kwazo zonke ingatsha ezisebenza lomphakathi,” kutsho uMoyo.