UMTHUNYWA

Mbeba, Mbeba, Mbeba! . . . ukhethwa kubadlali abazingcitshi kuBosso

Innocent Kurira

UMDLALI weHighlanders uAndrew Mbeba useqanjwe phakathi kwabadlali abalitshumi lanye ababalwa njengabadlala kuhle futhi okujabulisa abalandeli kuleliqembu kulandela ukukhethwa kwakhe ngabalandeli beqembu leli elinanza iminyaka engu-100 lasungulwayo.

UMbeba ukhethwe ukuba phakathi kwabadlali abane abazimvimbi eqenjini leBosso ku-Greatest XI of All Time, lapho abekwe khona kuzinga laboMercedes “Rambo” Sibanda, Dazzey Kapenya loThulani “Biya” Ncube.

Abadlali laba bamele izikhathi ezitshiyeneyo kumbali yeHighlanders, njalo ukukhethwa kwabo kutshengisa umsebenzi omkhulu abawenze ekuphakamiseni iqembu leli elidume kakhulu koBulawayo lakunguqu yelizwe jikelele.

Ukukhethwa kukaMbeba kuqakathekile ngoba usehlonitshwa ndawonye labadlali asebezakhele udumo olukhulu bezimvimbi kuHighlanders, okutsho ukuthi abalandeli bayawuqakathekisa umsebenzi wakhe eqenjini.

IHighlanders imemezele abadlali abasanda kukhethwa njengengxenye yomkhankaso wokunanza iminyaka engu-100 yasungulwayo.

Abalandeli beqembu yibo abavota bekhetha abadlali abafuna babumbe iqembu leBosso elikhulu kulawo wonke amanye ake aba khona kumbali yalo.

Ekhuluma lentatheli yeZimpapers Sports Hub ngoLwesithathu, uMbeba uthe uzizwa ephakanyisiwe.

“Ngiyabonga. Bengingacabangeli ukuthi ngizakhethwa kuluhlu olunje. Eqinisweni bakhona abadlali engibona angathi benza ngcono kulami, engibahlonipha kakhulu, Kodwa-ke, ngiyabonga ngalokhu abalandeli abakwenzileyo,” kutsho lumdlali.

Unozinti uTapuwa Kapini wayengowokuqala ukukhethwa, njalo ukukhethwa kukaMbeba lezinye imvimbi ezintathu sekukhuphule inani labadlali asebeqinisekiswe ukuba phakathi kweGreatest XI of All Time.