Online Reporter
YiNtatheli kaMthunywa
KUSEHLAKALO esitshiye izakhamizi zithwele imikhono, amalunga omdeni ezidla izibindi, kulezithandani ezitholakale zifile endlini yazo eGlen View, eHarare ngoLwesithathu ekuseni.
Kulokhu kungacaci ukuthi kuyini okubangele ukufa kwezithandani lezi loba kucatshangelwa ukuthi ukufa kwabo kungabe kuhlobene lodlakela lwemakhaya.
Kucatshangelwa ukuthi ababili laba, uNyasha Mhungu, 35, lomkakhe uOlga Muzhingi, 30, bangabe bezibulele.
Abaphenyi bathi indoda le, okubikwa ukuthi ibingumkhokheli webandla elingaqanjwanga njalo obeyisiqhwaga lapho esebenza khona, ibike yaba lokungazwanani lomkayo okwesikhathi esithile.
Kuzwakale ukuthi isidumbu sowesifazana sitholakale size, kukanti esendoda besigqokile.
Akakuqinisekisi ukuthi ukufa kwababili laba kubangelwe yikuzibulala. Amapholisa eHarare aqinisekise ngesehlakalo lesi loba uphenyo lusaqhubeka ukuze kutholakale imbangela yokufa.
Isehlakalo lesi senzakale ngemva kwamaviki amabili kufe uCommissioner, Dokotela Martin Muduva lomkakhe uLyliosa Chirara akade behlala eDzivarasekwa. Kubikwa uChirara wahlahlela umkakhe ngehloka andubana azibulale ngokunatha itshefu.
