Online Reporter
Nkosilathi Sibanda
“OZATHOLAKALA ethengisa injengu uzajeziswa ngembuzi ezinhlanu kusiya kwezilitshumi. Kuthi ozatholakala eyinatha uzathola isigwebo sembuzi ezintathu.”
La ngamazwi eNduna uKhulumani Mathema, weGwanda North esabelweni seMatabeleland South.
Induna uMathema ubike ukuba kasoke avumele ukuthi impilo zabantu bakulindawo zibhidlizwe yikunatha utshalwa obungekho emthethweni lokuphatheka kuzidakamizwa.
Lokhu kuza ngesikhathi iNduna uMathema iqhuba umkhankaso wokulwisana lezidakamizwa ngaphansi kohlelo lwe: “Hatshi esigabeni sami”.
Uhlelo lwe “Hatshi esigabeni sami” lwasungulwa yinhlanganiso ye-Young People’s Network on Health and Wellbeing (YPNHW), isebenzisana leNational AIDS Council (NAC), ngenjongo yokuvikela abantwana.
Amazwi enduna la, aqale ukusabalala phakathi kwalinyanga kunkundla zokuxhumana lapho agcizelele ngobubi obuza lokusebenzisa izidakamizwa esigabeni.
INduna uMathema ithembisa ukuthi izaqeda umkhuba omubi wokudakwa okwedlulisileyo ukuze
kuvinjwe lokhu, njalo uthe kuzakuba lezijeziso eziqinileyo. Ngokutsho komlayezo wayo enkundleni zokuxhumana, umhlaka 10 Mpandula bekulilanga lokucina kulabo abanatha labathengisa utshwala lobu, obungekho emthethweni.
“Sesithethe inyathelo ngoba sesibonile umonakalo obangelwa yinjengu. Ngixwayisa abantu ukuthi injengu ayisafuneki eNqameni. Akusikho ukuthi sifuna ukuvimbela abantu ukuziphilisa, kodwa kasifuni ukuthi ukuziphilisa komunye umuntu kube yimbangela yokubhidlika kwempilo yabanye, ikakhulu abatsha.
“Lowo ozatholakala ethengisa injengu uzajeziswa ngembuzi ezinhlanu kusiya kwezilitshumi. Kuthi umuntu ozabe eyinatha uzathola isigwebo sembuzi ezintathu. Kulesisijeziso, imbuzi eyodwa izanikwa umuntu oyabe elethe loludaba enduneni ukuze abantu bangathuli nxa bebona izinto ezinjalo,” kutsho induna Mathema.
INduna iphinde yaxwayisa abathengisa utshwala emizini yabo.
“Abantu abathengisa utshwala emizini yabo, lokhu angikuvumeli esigabeni sami. Nxa umuntu efuna ukwenza ibhizimusi yokuthengisa utshwala kumele alandele indlela esemthethweni. Angisoze ngivumele umuntu avule itshabhini phakathi komuzi wakhe, athengisele abantwana labantu abatsha, abesenza angathi akukho okwenzakalayo. Labo abaqhubeka besenza lokhu ngizabaxotsha esigabeni, bayedinga indawo lapho okuvunyelwa khona ukusebenza kwamatshabhini,” kutsho iNduna uMathema.
Ekhuluma lephephandaba likazulu ngoLwesithathu emini, iNduna uMathema uthe: “Engikuzwayo khathesi yikuthi abantu esigabeni basizwile isixwayiso njalo sebetshiya ukunatha utshwala lobu.
Leli linyathelo elihle njalo ngilethemba lokuthi kuzaqhubeka kunjalo,” kutsho induna uMathema ngesikhathi isemangweni.
Ukukhathazeka kukaMathema kuza ngesikhathi udaba lokusetshenziswa kotshwala lezida-kamizwa selusiba yinkinga engapheliyo emadolobheni lasezabelweni zasemaphandleni.
Kulandela isixwayiso senduna, sekuvele imibono eminengi ngalokhu enkundleni zokuxhumana. Inengi labantu lisekela induna.
U-Innocent Ndimande kuFacebook uthe: Injengu ludubo lwelizwe lonke okumele luxazululwe yiPhalamende.
“Into le ihlukumeza uzulu wonke. Ngakho akubhalwe incwadi iye kummeli wePhalamende, athathe udaba alufake ePhalamende.”
Kunkundla efanayo, uS’busiso S’busiso uthe induna kumele zisekelwe kulokhu.
“Azisebenze impela izinduna. Abantu bayaphela, kudala kithi kwakunathwa okunye ababekuthi ngusamdenyula kufana layo injengu induna yakuvala kwaphela nya.”
Ukuqiniswa komthetho yizinduna kuza ngesikhathi uHulumende, amapholisa lenhlanganiso ezizimele zodwa ziveze ukukhathazeka ngenani labatsha abahlanganyela ekuthatheni izidakamizwa okuyinto elimaza ikusasa labo njalo kulumathisa udlame ezindlini lobudlwangudlwangu obuphazamisa ukuthula ezigabeni.
