Online Reporter
Siphathokuhle Ngulube
Salibonani bafundi. Ngithemba liphilile njalo liqhuba kahle ezifundweni zenu. Abanye benu sebesalelwe ngamaviki angemangaki ukuba babhale imihloliso yabo yokuphela komnyaka.
Ngithemba limatasa lilungiselela le imihloliso ngoba phela imihloliso le ibuya kanye ngomnyaka ngakho kumele sisebenzise ithuba esiliphiweyo ukuze singabuyi sizibone sesiphinda umphehlo.
Kule iviki sizakhangela ukuxazululwa kwengxaki emakhaya. Izingxaki zivele zihlala zikhona ebantwini nxa bephila kodwa kumele lezo zingxaki zixazululwe ukuze abantu baqhubeke ngempilo.
Zikhona izinto ezijwayelekileyo ezidala izimpi emakhaya.
Lezi yizinto ezinjengokuthi inkomo zakomakhelwane zingene emasimini omunye umakhelwane zidle umumbu kumbe izilimo.
Leli licala elikhulu elidinga ukubanjwa kuhle ngoba nxa kungasenziwanga njalo sekungaba lengxabano enkulu ezakwenza ukuba ukuphila kubenzima ebantwini.
Nxa sekuthe kwenzakala lokhu, kulendlela yokukhulumisana abantu abamane baqondane nje baphendulane kuyazila.
Phela sekungacina kudala ukuthi kuxatshanwe kuze kubanjwane ngezandla ngoba phela omunye lo odlelweyo uyabe evele ethukuthele ngenxa yesehlakalo sokudlelwa izilimo zakhe.
Ngalokho-ke olenkomo ezidlileyo kufanele adinge umuntu omdala okwaziyo ukubeka amazwi njalo olekhono lokuthulisa lokwehlisa inzondo emuntwini.
Uzahamba ke lo othunyiweyo efunjathiswe amazwi oxolo. Lo odlelweyo sengafika atshinge kumbe njalo axotshe umathunywa lo.
Noma esethethiswe njani umathunywa uma ngamazwi izolo. Ngemva kwesikhathi lo owonelweyo usengehlisa ulaka adede mhlawumbe aqambe lokho afuna ukuhlawulwa ngakho.
Umathunywa uzawabisela amazwi enjalo. Sekuzakuthi nxa kubizwe noma inkomo kumbe imbuzi yena njalo umathunywa uzaziqhuba lezi izifuyo afike njalo aqhubeke ngokuxolisa.
Ngemva kwalokhu impilo iyaqhubeka nje kungathi akwenzakalanga lutho.
Kwesinye isikhathi kungenzeka ukuba umathunywa afike axotshwe njengenja khonale athunywe khona lanxa ezame kangakanani ukuxolisa.
Nxa sekwenzakale kanje lo olecala uzakuya kuSobhuku ayecela ukuncediswa ukuxolisa lo odlelweyo.
Kuzakuthi ke induna ibe isithuma isigijimi siyetshela lo odlelweyo ukuba uyacelwa ngelanga elithile.
USobhuku uzaqila akhulumisane laye yedwa andubana abize amanye amadoda lalo olecala.
Indaba izatshukwa ngamadoda lo odlelweyo encengwa ukuba ehlise ulaka ngoba kuvela kuyatholakala lokhu nxa abantu beyakhelene.
Kungenzeka ukuba avume ukuncengwa, lo olecala sezatshelwa isigwebo sakhe njalo lesi sigwebo uzasiletha phambi kwamadoda kube lobufakazi.
Uzabuya njalo athengele amadoda imbuzi ezabulawa yosiwe badle bakholise abantu. Ukubakhona kwesinye isikhathi ukuthi indaba yehlule kuSobhuku, iyadluliselwa enduneni iyetshukwa ngamadoda asebenzisana lenduna ukuxazulula izingxaki.
Lapha iNduna ilakho ukunquma ngendlela ebona ngayo njalo iNduna ayiphikiswa ngoba ingaphezu komuntu wonke esigabeni. Lokho okutshiwo yinduna yikho akuphikiswa.
Olecala uyakhupha isigwebo sakhe abuye akhuphe lembuzi kumbe izimbuzi amadoda enkosi awose kudliwe kubemnandi.
Ngalokho-ke ubungeke uthi wonele umuntu esigabeni umqondo wena ngokwakho uthi uyaxolisa.
Lokhu esintwini kuphathwa njengokudelelwa kakhulu ngakho kudinga ukuthi nxa wonele umuntu ucatshe sibili lingabonani ngamehlo ngoba sekungonakala kucine kuliwa.
Zinengi izingxabano ebezidala izimpi. Enye ejwayelekileyo eyokuthi umntaka makhelwane one intombazana yakomakhelwane.
Sekungenzeka abangakibo kantombi bamkhalalele kojaha.
Licala elikhulu kodwa kuyadinga ukuba kuthunywe umkhongi ayencenga ashweleze besekuhlalwa phansi kukhulunyiswane kuze kuye intombazana ibuyele ngakibo.
Okuvelayo lapha yikuthi emakhaya kulendlela eyaziwayo eyokuxazulula izingxaki.
Emadolobheni labo balendlela abenza ngayo sizakhangela ngeviki elizayo. Abanye bathi bona indlela yemadolobheni ayakhi njengendlela yemakhaya. Sizaxoxa ngakho kabanzi singakhangela indlela yemadolobheni besesiyiqathanisa lendlela yemakhaya.
Asihlanganeni kuviki elizayo.
