admin
YiNtatheli kaMthunywa
IZINTO zimhambela kuhle umqeqetshi weMamelodi Sundowns uPitso “Jingles” Mosimane njengoba engagcinanga nje ngokujabulela ukuwina isicoco se-Absa Premiership leqembu lakhe.
UMosimane uthe esajabulela ukuthela ethulini i-University of Pretoria nge 3-0 eTuks Stadium, okumenze wemuka leligi, wakhethwa njengomqeqetshi obatshaye bonke emakhanda ngoMbimbitho langoMabasa.
Lokhu kufana lokutshaya inyoni ezimbili ngelitshe elilodwa kodwa kuMosimane, akusoke kuvale isilonda lamanxeba abelawo ngemuva kokuphuma kuCaf Champions League lakuNedbank Cup.
Sekungokwesibili umqeqetshi ekhala esemuka lesicoco seligi selokhu athatha intambo kuMasandawana kumasizini amathathu edluleyo. Ngaphandle kwesicoco seligi ubesanda kukhangelana lokuthi abengumqeqetshi wokuqala ukuziwina zonke izicoco ezikhona kuPremier Soccer League (PSL).
UMosimane ubonge wanconcoza ngokuthi uphinde wakhethwa njengomqeqetshi ophezulu.
“Siyabonga ukuthi sikhethwe lapha, kuyajabulisa. Ngizothanda ukubonga abezindaba lamajaji ngoba ngaphandle kwabo ngabe asikho lapha,” kutsho uMosimane.
“Ngokunqoba isicoco seligi sijabulile. Bekubonakala sengathi ngeke sisinqobe ngenxa yokuthi sikhitshwe yi-AS Vita kuChampions League. Ngemuva kwalokho kube yi-Orlando Pirates, sahlulwa ngesikhathi esengeziweyo. Saba lenhlanhla sidlala ngokulingana le-Ajax Cape Town. Bonke bebethi sikhathele ngabatshela ukuthi akunjalo.”
“Ngizithathile izeluleko zabaqeqetshi abake banqoba iligi ngaphambilini ababalisa uTed Dimitru, Gordon Igesund loGavin Hunt.
Uthe kumele bakhohlwe yisicoco seligi ngoba vele sekumele bakhangelane lemidlalo weCaf Confederation Cup abazowudlala leMedeama SC, yaseGhana.
Kusenjalo, uUKhama Billiat ukhethwe njengomdlali owedlule bonke kunyanga ezimbili ezedluleyo.
“Ngizothanda ukubonga ozakwethu engidlala nabo. Bayangisiza ngendlela engidlala ngayo. Okwamanje ngisagxile ekusizeni iqembu ukuthi lenze kahle emidlalweni esele yeligi bese siya kweyeCaf. Indaba yaphetsheya ayikho emqondweni wami,” kutsho uKhama.
Kusenjalo, umnikazi weSundowns uPatrice Motsipe ubonge abadlali bakhe kanye losekelo abaluthole kunkokheli labahlwuleli bePSL.
“Abantu abafanele ukubongwa ngomsebenzi omuhle lithimba labaqeqetshi labadlali. Ngibonga wonke umuntu.
Ngibonga emaqenjini abelesandla eminyakeni edluleyo kuPSL. Mina ngisemutsha lapha, yingakho kusemqoka ukuthi ngibonge uKaizer Motaung, Irvin Khoza, Mato (Madlala) lo(Mike) Mokoena,” kusho uMotsepe.
ISundowns isinqobe isicoco seligi kane selokhu yathengwa nguMotsepe. Inqobe ngo-2005/2006 (Miquel Gamondi/Neil Tovey), 2006/2007 (Gordon Igesund), 2013/2014 (Pitso Mosimane) lasizini le. Lesi yisicoco sesikhombisa samaBrazilians ngaphansi kwePremier Soccer League, okwenza kube yiwona ahamba phambili.
Online Reporter