admin
Nkosilathi Sibanda
ABADLALI abasakhulayo kuqembu le-Highlanders nxa befuna ukukhula kuhle emdlalweni wenguqu, kumele bafundele kulabo asebekhulile, uMkhokheli Dube loMichelle Katsvairo.
Loba abadlali bobabili bengakavumelani leqembu ngokupheleleyo, usekelo balalo oluvela kumqeqetshi uMark Harrison.
“Abadlali abasakhulayo bazafunda okunengi kulabo abalesikhathi eside bedlala.”
Umqeqetshi lo oqabuka ukukhuza iBosso uyibeke yacaca indaba yakhe yokukhetha abadlali laba. Abalandeli baleliqembu basola mhla besizwa ukuthi uDube loKatsvairo sebedlala ngoba bethi sebekhulile njalo bathathela abafana abasakhulayo ithuba.
Kungumbono kaHarrison ukuthi iqembu lizaguquka lidlale ngcono ngokuza kwalaba bobabili. Uncome indlela abadlale ngayo iBosso inqoba iBlack Rhinos nge 1-0, kubhola elihlohlwe nguDube.
Kulumdlalo, loba ethakazelele uDube lo-Katsvairo, uHarrison utshengise ukuba labadlali abasacathula uzabanika ithuba. UHarrison, ofike kuHighlanders waphiwa elithi nguHadebe, ubelokholo kubadlali bonke abasakhulayo abatshiywa nguMadinda Ndlovu.
Kubadlali laba sekuphume ithalenta elibonakalayo ukuthi kwelizayo lingenelisa ukuthwala inkezo yeligi.
Udlalise abadlali ababalisa umgadli uPrince Dube, uDevine Mhindirira, uBrian Banda,uHumphrey Ncube, uMbongeni Ndlovu, uCollin Mujuru, uCharlton Siamalonga, uAdrian Silla Ndlovu, uRay Lunga, uTinashe Makanda, uTendai Ndlovu, uBukhosi Sibanda, uCleopas Kapupurika loReward Muza.
Umqeqetshi lo wazise ukuba uhlele ukuthi aqoqe imidlalo emibili yobungane ukuze asuthiseke ngokuqina kweqembu lakhe. Ubuciko buka-Harrison buzabonakala ngesikhathi iqembu lidibana lentshantshu zeligi iFC Platinum mhlaka 14 kulinyanga kumbango wenkezo yeCastle Challenge.
Inkezo le idibanisa intshantshu yeligi leqembu elanqoba kunkezo yeChibuku Super Cup.
Online Reporter