admin
YiNtatheli kaMthunywa
UKUNQOBA kweqembu le-Chicken Inn kumqhudelwano weMalawi Energem International Bonanza sekukhukhumeze umqeqetshi wayo u-Joey Antipas osekholwa ukuthi uzathwala lenkezo yeligi ekhaya.
Uphenduke ezizwa ebika lokuthi ufuna ukuyancintisa lasemidlalweni yentshatshu ze-Africa eze-Conferation of African Football (Caf) Champions League.
AmaGamecocks ayachinsa ukuhluthuna inkezo yeMalawi le ehlanganisa amathimu agoqela iNyasa Big Bullets, Be Forward Wanderers le UD Songo yaseMozambique.
Umfana omutsha eqenjini uLeroy Ndlovu ugaxe elakuqala entanjeni, anduba uBrett Amidu aliphosele ngemva kukanozinti kumdlalo wokucina walinkezo bedibene le UD Songo. Umdlalo lo yiwo onikeze uAntipas ukuzethemba ngabadlali abumbe ngabo iqembu lesizini ka-2020.
Umqeqetshi lo, owakhutha ugatsha ngemiklomelo emithathu ukuba yintshantshu ngesizini edluleyo, ubike ukuba uza ngesivuvu.
“Ngokubunjwa kweqembu lethu, singayithwala iligi. Yinhloso yethu leyo,” kutsho uAntipas esanda kwehla ebhasini evela eMalawi.
Umqeqetshi lo welule ukuba nxa into zimhambela kuhle kulisizini, iqembu lakhe lizancintisa kumqhudelwano we-Caf.
“Sifuna ukuyamela isizwe kumidlalo yeCaf Champions League.”
Lo nguye umqeqetshi owafikisa iChicken Inn kunkundla ze-Africa, kulandela ukuba zingqwele zenguqu yeZimbabwe ngesizini ka2015.
Ebuzwa ngesimo sabadlali abatsha, uAntipas uthe kasoli lutho ngoba bafike eMalawi bezinikela enkundleni. Kubadlali abatsha abathile ithuba lokuyaligiqa eMalawi kuloNielson Nekati, uNdlovu, uShepard Mhlanga, Clive Dzingayi, uNicole Mutatiwa, Paddington Nyamakura, Brian Dzingai lo Bryan Giant.
“Eqinisweni, bonke abadlali bangitshengise ukuthi bazadlala, bezinikele kulisizini. Lokho ngokunye okungiqinisayo njengomqeqetshi,” kutsho uAntipas
Online Reporter