Vusumuzi Dube
Ethel Ncube
ABALIMI sebekhuthazwe ukuthi balime idelele ngoba lithandwa ngabantu abanengi njalo lingenza umlimi abe lenzuzo ephezulu.
UMnumzana Celiwe Ndlovu ongu-Agricultural Extension Officer ukhuthaze abalimi ukuthi balime idelele ngoba lilomkambo omkhulu.
Uthe idelele kalihluphi ukulima okutsho ukuthi umlimi ongakaze alilime angenelisa ukulilima limnike imali enhle.
“Idelele kalihluphi ukulima njalo sikhuthaza abalimi ukuthi beqale balungise umhlabathi wabo ulingane bengakahlanyeli isilimo lesi,” kutsho uMnu Ndlovu.
Uqhubekele phambili wathi idelele lilomhlabathi elivuma kiwo.
“Idelele lenza kuhle kakhulu kumhlabathi olivutshevutshe futhi olobumunyu obuphakathi kwe 5,8 kusiya ku 6,5,” kutsho uMnu Ndlovu.
Uthe ukhuthaza abalimi ukuthi benze imizila nxa sebehlanyela.
“Sikhuthaza abalimi ukuthi nxa sebehlanyela benze imizila njalo balehlukanise nge-40 kusiya ku-50cm. Amagodi wona sikhuthaza abalimi ukuthi bagebhe amagodi atshona okwe-45cm bawafake umquba okuthiwa yiCompound D, besebefaka intanga ezimbili egodini linye ngalinye,” kutsho uMnu Ndlovu.
Uthe idelele limila ngemva kwamaviki amabili.
“Idelele lithatha amaviki amabili ukuze limile njalo sikhuthaza abalimi ukuthi belifafaze nge-lumbda nxa selimilile ukuze bebulale ama-cutworms,” kuphetha uNdlovu.
Online Reporter