Online Reporter
Nkosilathi Sibanda
AMA-WARRIORS azavula umkhankaso wawo kuMukuru Four Nations Tournament ngomdlalo lapho azadibana khona leqembu leBotswana ngoMgqibelo ngehola lesithupha ntambama.
Imidlalo iqala mhlaka 28 kusiya ku 31 Mbimbitho 2026, eFrancistown eBotswana njalo ixhaswa yinkampani yeMukuru.
Amanye amazwe akulumqhudelwano yiZambia leMalawi, wona azadlala ngehola lesithathu emini kumdlalo wakuqala.
Umqhudelwano lo ukhangelelwe ukuvusa ukuncintisana phakathi kwamazwe la angaphansi kwenhlanganiso yeConfederation of Southern African Football Associations (Cosafa) njalo unike amaqembu ithuba lokuzilolonga emidlalweni eqinileyo.
Kuqembu leZimbabwe, lumqhudelwano uza ngesikhathi esiqakathekileyo njengoba umqeqetshi wamaWarriors, uMarian Marinica, ekhangelele ukusebenzisa imidlalo le, ukuhlola abadlali abanengi, ikakhulu abasakhulayo labangajwayelanga ukudlala, ngaphambi kwemidlalo emqoka ezayo.
Phakathi kwemidlalo le, abafana belizwe balungiselela imidlalo yokulungiselela i-Africa Cup of Nations ka2027, njalo abaqeqetshi bafuna ukuqinisa iqembu ngokukhetha abadlali abangaphatha umsebenzi omkhulu ngesikhathi esizayo.
UMarinica uthe kubalulekile ukunikeza ithuba abadlali abatsha ukuze iqembu lithole ukuqina phakathi kwalabo abazingcitshi labasakhulayo, ukuze lilungele imidlalo enzima ezayo.
Kusenjalo, umongameli weZifa uNqobile Magwizi, wamukele ngenjabulo ubudlelwano phakathi kweZifa lenkampani yeMukuru, ebika ukuba buzaqinisa ukuthuthukiswa kwebhola kuleli.
“Siyajabula kakhulu ukwamukela iMukuru njengomxhasi omkhulu walumqhudelwano. Lokhu kutshengisa ukusekelwa komsebenzi esiwenzayo wokwakha kakutsha ibhola leZimbabwe, njalo kubeka iZifa njengomsekeli othembekileyo kumabhizimusi, ekhaya langaphandle.”
Umphathi wezokuthengiselana weZifa, uMark Ruck, uthe lobu budlelwano bubonisa ukuthi ibhola liyaqhubeka likhula njalo lidonsaa amankampani amakhulu.
“Ukusekelwa yiMukuru kutshengisa ukuthi amabhizimusi aseqala ukubona ukubaluleka kokusebenzisana lebhola lombono weZifa. Sakha ubudlelwano obuqakathekileyo obuzasiza umdlalo, buvulele amankampani amathuba,” kutsho uRuck.
