admin
Joel Ndlovu
Abalimi abafuye imbuzi sebekhuthazwe ukuba badinge ulwazi ngendlela eziqondileyo zokugcina kuhle izifuyo zabo okuzenza zihlale zikhululekile okuyikho okwenza umhlambi ukhule.
Ekhuluma lentatheli kaMthunywa uMnumzana Ntandoyenkosi Ndhlovu onguAgronomist kunkampani yeWorld Shakers Investment uthe imbuzi kazifuni kubamanzi kumbe ukuhlala lapho okumanzi khona ngakho-ke kumele umfuyi azihlalise lapho okuvaleke khona nxa izulu lisina.
“Imbuzi zinyamazana okumele zigcinwe ngonanzelelo ngoba azifuni kubamanzi ngakho-ke umlimi kumele abone ukuthi azinethwa lizulu, ngokuzivalela lapho okunganetheli khona.
“Imbuzi ziyahlukumezeka nxa zingahlaliswa esibayeni esinethelayo njalo kwenza zicine sezigula. Kungakho-ke umlimi kumele akuqaphele lokhu ngoba ulakho ukucina elahlekelwe yizifuyo zakhe,” kulandisa uMnu Ndhlovu.
Uqhubekele phambili esithi imbuzi ngesikhathi somqando kumele zinathiswe amanzi akhudumalayo.
“Imbuzi zakho kumele uhlale uzipha amanzi amatsha kumbe ahlanzekileyo okunatha ukwenzela ukuthi zinganathi alengcekeza.
“Ngesikhathi somqando kumele uziphe amanzi akhudumalayo ukwenzela ukuthi zingagodoli njalo zingahlukumezeki emoyeni ngoba amanzi aqandayo ngesikhathi somqando ayazigodolisa,” kuchaza uMnu Ndhlovu.
Uphethe ngokuxwayisa abalimi ukuthi nxa kulembuzi ezimunyisayo esibayeni baziphe ukudla okunengi okule-protein kanye lamanzi ukuze zithole amandla. Ezimithiyo lazo kumele zigcinwe ngonanzelela njalo ziphiwe ukudla okunengi.
Online Reporter