admin
Joel Ndlovu
Abalimi sebekhuthazwe ukuba bakhiphe ukhula lapho abahlanyele khona izilimo zabo ngoba ukudla konke okumele kube ngokwesilimo kucina kudliwa lukhula isivuno sicine sisehla.
Ekhuluma lentatheli kaMthunywa uMnumzana Mike Rugowo oyincitshi kwezokulima lokufuya esabelweni seMatabeleland North uthe ukhula lubi kakhulu emasimini ngoba luyaqedela izilimo ukudla ngakho-ke akumelanga umlimi abelivila lokulusuphuna.
“Ukhula luyadla ukudla okumele lube ngolwesilimo uthole lona solukhula kakhulu ukwedlula isilimo. Isilimo usibona ngokuswaba ukuthi asitholi amanzi lokudla okwaneleyo ngenxa yalokho umlimi kumele abone ukuba kuhlala kungelakhulu ensimini yakhe zikhathi zonke.
“Kulokudla okuvela emoyeni okungena enhlabathini okuqakatheke kakhulu njalo okudingwa yisilimo, ukhula nxa lungakhitshwangwa luyadla ukudla lokho lukhule njalo lucine solulunengi,” kulandisa uMnu Rugowo.
Uqhubekele phambili eveza okunye okuyingozi okungabulala isilimo.
“Ukhula ayisilo lodwa olubulala isilimo, umlimi kumele njalo afafaze imithi ehleliweyo ebulala izibungu ezihlasela izilimo.
“Kulemikhuhlane etshiyeneyo njalo ehlasela izilimo ngendlela ezitshiyeneyo edinga ukuthi umlimi ayibulale ngemithi yakhona. Eminye imikhuhlane ingekelwa iyathelelana uthole izilimo zonke sezifile,” kutsho uMnu Rugowo.
UMnu Rugowo uphethe ngokuthi umlimi lapho alime khona kumele akhiphe ukhula ngaso sonke isikhathi njalo afafaze imithi edingakalayo ukubulala izibungu lemikhuhlane ehlasela isilimo.
Online Reporter