Online Reporter
Ethel Ncube
INHLANGANISO ebona ngokugcinwa kuhle kwenkomo zochago isixwayise abalimi abafuye inkomo lezi ngendlela abangazilandela ukuze balondoloze uchago lwabo lungavuthwa.
UMnumzana Cosmas Muzunde onguDairy Officer esabelweni seMatabeleland North ukhuthaze abalimi abafuye inkomo zochago ngendlela zokunakekela kuhle uchago.
Uthe uchago luyaphangisa ukuvuthwa ngaleso sizatho kumele lunakekelwe kuhle ukuze luhlale isikhathi eside.
“Sikhuthaza abalimi ukuthi behlalise uchago endaweni ehlanzekileyo njalo eqandelelayo. Akumelanga futhi abalimi bahlanganise uchago oluqandayo lochago olukhudumalayo, lolu kungabe kuyilolo olusanda kusengwa, lokhu kucina kuluphambanisa,” kutsho uMnu Muzunde.
Uqhubekele phambili wathi ukuze uchago lugcinakale, kumele luhlaliswe endaweni ehlanzekileyo.
“Uchago olusengwe ngumuntu ohlanzekileyo, esebenzisa impahla ehlanzekileyo luyahlala isikhathi eside.
Sikhuthaza abalimi ukuthi bengaqeda ukusenga uchago lwabo balufake endaweni eqandayo lube le-temperature eyi 4 Degrees Celsius kungakadluli amahola amathathu njalo luhlale luqanda lungakahanjiswa ukuthi luyelungiswa,” kutsho uMnu Muzunde.
Uthe kulendlela abalimi abangazilandela ukuze uchago lwabo luhlale luqanda.
“Kulendlela abalimi abangazilandela ukuze uchago lwabo luhlale luqanda, ezigoqela ukugcina uchago ngaphansi komthunzi, ukulufaka phakathi kukamaqandisa kumbe ukulufaka egabheni elilamanzi aqandayo phakathi,” kutsho uMnu Muzunde.
Uthe ukhuthaza abalimi ukuthi bengavali kakhulu amagabha ochago.
“Sikhuthaza abalimi ukuthi nxa beqandisa uchago bengavali kakhulu isivalo segabha lochago ukwenzela ukuthi kuphume umoya njalo bebone ukuthi akulamanzi angenayo echagweni,” kuphetha uMnu Muzunde.
