Online Reporter
Ethel Ncube
AKUBIZWA ozwayo ngoLwesihlanu kuyonale iviki e-Amagugu International Heritage Centre eMatopo lapho okuzabe kulomcimbi wokuthakazelela ukudla kwesiNtu.
Umcimbi we-Food Expo uzathatha amalanga amabili kulindawo njalo kuzabe kudliwa njalo kubukiswa ukudla kwesintu kudlalwa lemidlalo yesintu.
Intatheli ixhumane loMellisa Moyo ongomunye wabaqoqi bomcimbi lo.
“Kuzabe kule-food expo e-Amagugu lapho okuzabe kusenziwa okutshiyeneyo. NgoLwesihlanu 23 Nkwenkwezi kuzabe kule-conference abantu befundiswa ngenhlelo zokudla kwesintu ilanga lonke khonale e-Amagugu kudliwa ukudla kwesintu. Kuthi ngelanga lesibili kuzabe kulilanga lemuli lapho abantu abazabuya beyimuli bezobona ukudla kwesiNtu lokusekela omama beMatopo abazabe bebukisa ukudla kwabo kwesiNtu,” kutsho uMelissa.
Ubuye waveza ukuba unxusa uzulu wonke ukuba abuye e-Amagugu.
“Siyanxusa abantu abavela endaweni ezitshiyeneyo ukuba siyehlangana e-Amagugu, abasukela koBulawayo inqola zokuhambisa zizabe zikhona yikuthintana lathi uzwe ukuba kuyabe kusukwa sikhathi bani njalo uphathe lamasheleni akho ozawasebenzisa khonale.
“Omama bazabe bebukisa ukudla kwesiNtu, badinga ukuba sibasekele ukuze baphakame labo. Singabambana siphakame sonke siyethakazelela izinto zesiNtu lamasiko ethu,” kuphetha uMelissa.
