Online Reporter
Ethel Ncube
KUSIGA esihlasimulisa umzimba kulendoda yeMatama, eLupane ehlahlele isalukazi esileminyaka engu-72 ngehloka ekhanda qede yasithela ngephalafini yasilumathisa ngomentshisi siphila, uMthunywa uyakuveza lokhu lamhlanje.
Isehlakalo lesi senzakale ngeSonto.
UChristine Ncube oleminyaka yokuzalwa engu-72, ulwela impilo yakhe esibhedlela seMpilo koBulawayo ngemva kokuhlahlelwa ngehloka qede wathelwa ngepharafini umzimba wonke bamlumathisa ephila nguSibongiseni Mpofu oleminyaka engu-28 yokuzalwa esithi ngumthakathi.
Intatheli zivakatshele ugogo esibhedlela zamthola esesimeni esibi.
Isakhamuzi esikhulume lentatheli uNkosazana Siphiwe Ndlovu ubike ukuba bamadolonzima ngesiga lesi.
“UGogo uMaNcube uthi wayebasa umlilo ekuseni uSibongiseni Mpofu wafika wathi uzocela amafutha okupheka wamnika kodwa kulokuba ahambe kodwa waqhubeka ehlezi.
“Khonokho uSibongiseni wadobha ihloka wahlahlela ugogo ekhanda wawela phansi wasethatha isigubhu sepharafini esasilapho wamthela umzimba wonke qede wamlumathisa esithi uyaloya andubana amfulathele angathi kaboni.
“Ngenhlanhla ugogo wezwakala ehlaba umkhosi omakhelwane bagijima bamthola egiqika esitsha bafika bamthela amanzi umlilo waze wacitsha emzimbeni wathwalelwa esibhedlela seSt Luke’s wafika wadluliselwa eMpilo koBulawayo,” kutsho uNkszn Ndlovu.
Esinye isakhamuzi, esale ukuveza igama laso sisesabela impilo yaso, sibike ukuba ugogo usesimeni esinzima.
“Ugogo utshile kakhulu, etshiswa ngumuntu owayesithi ungumthakathi kodwa ubufakazi bakhona bokuthi wathakatha bani bungekho.
“Imuli ezimbili khathesi sezizazondana ngento engelabufakazi. UGogo wagijinyiselwa esibhedlela seSt Luke’s kodwa wasedluliselwa esibhedlela seMpilo lapho alaliswe khona,” kutsho isakhamuzi lesi esingathandanga ukuqanjwa igama laso.
Isikhulumi samapholisa eMatabeleland North uInspector Glory Banda uthe udaba lolu solusezandleni zabo.
“Sichwayisisa ngodaba lwesalukazi esihlahlelwe ngehloka sabuye sathelwa ipharafini satshiswa ngesinye isakhamuzi sisetheswa ubuthakathi,” kutsho uInsp Banda.
“Umamangala usesibhedlela lapho alaliswe khona. Udaba lolu lusachwayisiswa. Sicela uzulu nxa ethe waba lohlupho alungisise uhlupho ngokukhulumisana lezinkokheli, abafundisi kumbe esinye isihlobo kulokulwa,” kutsho uInsp Banda.
