Online Reporter
IKHIPHE isidumbu impi yabafundi beNomathiya Technical High School, koSomkhele, eMtubatuba eSouth Africa ngoLwesithathu ntambama. Ngokuthola kwentatheli, kuthiwa kulombango wezigodi omdala, kodwa okukhiphe isidumbu, kungenxa yentombazana ebibangwa.
Kubikwa ukuthi umufi uNqubeko Buthelezi obefunda uGrade 11, ubekade engayisiyo ingxenye yabalwayo kodwa ubezwana labasembangweni wentombi. Kuthiwa impi iqale esikolo, bayilamula othitsha, kuthe uma kuphuma isikolo, yasuka okuyilapho egwazelwe khona uNqubeko ngaphandle kwesikolo watshonela khona lapho. Umthombo wentatheli, uthi ukulwa kwabafundi ngokwezigodi kujwayelekile, kodwa okwenzakale ngoLwesithathu kuwutshaqisile umphakathi.
“Umfundi ogwaziweyo ubengayisiyo ingxenye yempi, kusolakala ukuthi kulaba ebebesilwa, kukhona abuye ahambe labo — okungenzeka ukuthi bebekhiphela kuye ukucasuka kwabo. Umfundi ufele khona lapho ngaso leso sikhathi,” kutsho umthombo.
Kuthiwa umfundi obebangwa ufunda kusona lesi sikolo. Ngokutsho kwabantu ababonileyo kusenzakala lesi sehlakalo, kuthiwa lo obetshaywa akabuyiselanga wabe esethinta asondelane labo. Kuthiwa lesi sigameko senzakale eduzane lesikolo.
“Limpi ibisihlanganisa labantu okungesibona abafundi, kodwa ukulwa kwabo bekuthinta abafunda ngaphakathi. Ngesikhathi bevimbana, abanye babalekile. Lo oshonileyo kabalekanga, bamgwaze watshonela khona lapho. Othitsha bafike selidume ledlula, isilele phansi ingane ingasekho emhlabeni. Sidumele, iyathusa le nto eyenziwe zingane,” etsho.
Imizamo yokuthola isigungu sabazali bakulesi sikolo ayiphumelelanga.
Okhulumela uMnyango wezeMfundo KwaZulu-Natal uMnu Muzi Mahlambi uthi badlulisa amazwi enduduzo emdenini, kothitsha lakubafundi.
“Umnyango wezeMfundo udlulisa ukudabuka kakhulu ngokwenzakeleyo,” utsho njalo. — Isolezwe
