admin
YiNtatheli kaMthunywa
SOKUKOMPUNZI idla emini eguswini leMandundumela eLupane nanko phela abazingeli sebeziqedile indlovu ngokuzifakela i-cyanide emachibini ezinatha khona ngenhloso yokuthatha impondo bayethengisa.
Kuzwakale ukuthi ukubulawa kwendlovu lokhu kuqale kumnyaka ophelileyo lapho okwatholakala khona indlovu zifile eguswini leMandundumela zikhitshwe impondo kwabuya njalo kwatholakala ezinye eziyisithupha zifile lazo zingelampondo emavikini amabili adluleyo okucatshangelwa ukuthi zifakelwa i-cyanide ngabazingeli.
UMthunywa ukhulumisane lesinye isisebenzi seForestry Commission esithande ukubizwa ngokuthi nguChituma sachaza ukuthi siyamangala ukuthi indlovu lezi zibulawa amapholisa eForestry Commission engaphi.
“Into esuka imangalise yikuthi amapholisa eForestry Commission ayabe engaphi ngesikhathi indlovu lezi zifakelwa umuthi lo ngabazingeli. Lokhu kuyasolisa ngoba amapholisa la alinda ehlala eduze lamachibi akuleli gusu okokuthi njengoba indlovu lezi zifakelwa emachibini la kufanele bababambe abazifakelayo kumbe bazibone masinyane.
“Nxa kuyikuthi amapholisa la kalalwazi mayelana labantu ababulala indlovu lezi kutsho ukuthi kawasebenzi kuhle ngoba ngeke kungene abazingeli eguswini babulale indlovu zize zibonakale sezabola kudala,” kutsho uMnu Chitaka.
Omunye wamapholisa ale inkampani asebenza ukulinda izinyamazana uchaze ukuthi okwenza behluleke ukubamba abazingeli laba yikuthi balutshwana kakhulu.
“Thina sisebenza sibalutshwana ngakho kunzima ukuba senelise ukubamba abazingeli laba abafakela indlovu njengoba igusu esililindayo lilikhulu kangaka,” kutsho ipholisa leli.
Intatheli ixhumane loManager weForestry Commission eLupane uMnumzana Bulelani Ndlelambi wachaza ukuthi indaba yokubulawa kwendlovu uyayazi kodwa ngeke akhulume lutho.
“Indaba yokutholakala kwendlovu zifile eguswini leMandundumela ngiyayazi kodwa ngeke ngikhulume lutho, buzani umkhulu wami,” kutsho uMnu Ndlelambi.
Ebuzwa ngale indaba uGeneral Manager weForestry Commission esabelweni seMatabeleland North uMnumzana Armstrong Tembo uvumile ukuthi indaba yokufakelwa kwendlovu eLupane uyayazi.
“Kuliqiniso sibili ukuthi indlovu zatholakala zifile eguswini leMandundumela eLupane okucatshangelwa ukuthi zafakelwa ngabazingeli bathatha impondo.
Indaba le yenzakale emavikini amabili adluleyo ngakho amapholisa ethu athi selandela abazingeli laba kwana izulu lacitsha inyawo zabo yikho okwenza ehluleka ukubabamba,” kuphetha uMnu Tembo.
Online Reporter