admin
Cornelius Luphahla
LOKHE zibambe umlomo wangaphansi izakhamizi zesigabeni seDlawa, eNkayi ngemva kokuba esinye isakhamuzi sakule indawo sihlahlele esinye ngehloka ekhanda kubangwa imbuzi ezidle umumbu waso.
Isiga lesi senzakale ngoLwesihlanu kuviki ephelileyo lapho uEdwin Nkomo ahlahlele khona uMicah Dube ngoba imbuzi zakhe zidle umumbu kaNkomo.
UMthunywa uzwe ukuthi imbuzi zikaDube besezingene kathathu endlini kaNkomo zisidla umumbu.
Kubikwa uNkomo wavalela imbuzi lezi esibayeni sezidle umumbu lo okwesine okuyikho okwamenza wagamula uDube ngesikhathi esezilanda.
UMthunywa ukhulumisane lesinye isihlobo sikaNkomo, uMnumzana Ntandoyenkosi Nkomo obikele intatheli ukuthi nguye owalamulela uDube.
“Mina ngangikhona mhla uNkomo egamula uDube njalo yimi engalamulayo ngoba wayezambulala. UDube wafika elanda imbuzi zakhe ezazivalelwe esibayeni sikaNkomo. Ekufikeni kwakhe wafika waxolisa wathi ubengekho ekhaya ngakho imbuzi zakhe zifohlile.
“Ngalesosikhathi mina nganginganazelelanga ukuthi uNkomo wayefihle ihloka ngaphansi kwesitulo sakhe.
Walidobha ngokuphangisa wagamula uDube kanye ekhanda ngahle ngamthathela ihloka ngemva kwalokho ngabiza ezinye izakhamizi sahambisa uDube esibhedlela seMbuma,” kulandisa uMnu Nkomo.
UNkosazana Getrude Nyoni umkaMnu Dube ubikele intatheli ukuthi umkakhe sowaphuma esibhedlela njalo indaba yakhona basayilungisisa.
“Umkami uphume ngeSonto esibhedlela noma nje amanxeba engakapholi. Indaba le sizayikhuluma kosobhuku ngemva kwalokho uNkomo abesezahlawula,” kutsho uNkszn Nyoni.
Usobhuku wakule indawo uMnumzana Dumisani Ncube uthe indaba le izathoniswa enkundleni yakhe kuviki ezayo.
“Kuliqiniso sibili ukuthi uNkomo wagamula uDube ngehloka bebanga imbuzi ezadla umumbu. Indaba le ngizayithonisa kuviki ezayo uDube engasila njengoba esesebuhlungwini,” kuphetha uMnu Ncube.
Online Reporter