Online Reporter
Intatheli kaMthunywa
KULENDODA eleminyaka engu-20 yokuzalwa yeFort Rixon, esigabeni seNsiza, evele phambi komthethwandaba isolwa ngecala lokudlwengula lokutshontshela ugogo oleminyaka engu-84 imali engange-US$1 200.
Umsolwa uNdumiso Nyathi, ohlala ePioneer Village 1, umiswe phambi kukamantshi uMnumzana Mark Dzira eTredgold, ebhekane lamacala amabili la.
UNyathi uphike womabili amacala. Umthethwandaba usumgodlile esitokisini kwaze kwaba mhlaka 17 Ncwabakazi lapho ukuqhutshwa kwecala lakhe okuzaqhubeka khona.
Umtshutshisi kulelicala uNkosazana Rumbidzai Gwishiri, utshele umthethwandaba ukuthi mhlaka 29 Ntulikazi, ngehola letshumi lanye ekuseni, uNyathi wahlangana lomamangala esingeke sichaze igama lakhe ngehola lika-11 ekuseni egangeni edinga inkomo.
Ababili laba kabala buhlobo kodwa bahlala esigabeni sinye.
Kubikwa umsolwa wagongoda umamangala esiphundu ngesikhali esingaziwayo okwabangela ukuthi awele phansi.
Eselele phansi wamdlwengula, wananzelela njalo ukuthi wayegaxe isikhwama entanyeni wasithatha njalo sasilemali engange US$1 200.
Ngemva kokwenza lokho, umsolwa wasuka wabaleka.
Kubikwa umamangala wabikela umakhelwane wakhe ngesehlakalo lesi, umakhelwane wabikela ezinye izakhamizi, ezahamba zayabamba uNyathi emzini wakhe.
Udaba lwabikelwa amapholisa, umamangala wayahlolwa esibhedlela se-United Bulawayo Hospitals.
