Vusumuzi Dube
Ethel Ncube
ZIKHAKHAMELE izakhamizi zeMkoba eGweru kulandela ukuba enye indoda ikhande umkayo ngesando yambulala imcabangela ukuba uyajola ngeviki ephelileyo.
Umetheswacala uNhlalo Darlington Baloyi (37) usolelwa ukuba ubulele umkakhe, uPatricia Nyathi (32) kulandela ukumgongoda ekhanda kanengi ngesando endlini yabo eMkoba 4.
Kuvele ukuba uBaloyi odabuka eMkonto Village, ngaphansi kwenduna uNtabeni eZhombe ungumakorokoza.
UNyathi kubikwa ubehlala loBaloyi eMkoba 4 kusukela ngoZibandlela ngomnyaka ka-2025.
Ngosuku ambulala ngalo, uPatricia wayehlanza impahla phandle lapho uBaloyi aqala ukumthonisisa ngokungathembeki.
UBaloyi wangena endlini waphuma ephethe i-shock absorber yemota. Indodakazi kaNyathi, uSibothabo Sibanda (13), yamvimba ekusebenziseni i-shock absorber. UBaloyi wabuyela endlini waphuma esephethe isando.
Kuthiwa watshaya uNyathi ekhanda kanengi ngalesosando okwenza uNyathi wawela phansi wedlula emhlabeni
Isikhulumi samapholisa eMidlands uInspector Emmanuel Mahoko ubike ukuba umetheswacala kakabotshwa.
“Sicela amalunga omphakathi alolwazi ngalapho okulometheswacala uNhlalo Darlington Baloyi ukuthi azise amapholisa aseduzane laye, noma asebenzise iWhatsApp yeZRP ku-0712800197 ukusibikela,” kutsho uInsp Mahoko.
Online Reporter