Danisa Masuku
KULENDODA eleminyaka engu-50 yokuzalwa emiswe emthethwandaba isolwa ngecala lokudlwengula umntwana oleminyaka engu-13 yokuzalwa.
UCrispen Sithole uvele phambi kukamantshi womthethwandaba wakoBulawayo, uNkosikazi Sibongile Marondedze, esolwa ngecala lokudlwengula.
USithole ubengela mmeli njalo uNkosikazi Marondedze umchasisele ngelungelo lakhe lokufaka isicelo sebheyili emthethwandaba omkhulu kanye lokuthi angadinga igqwetha.
Umsolwa kazange abuzwe ukuthi uyalivuma kumbe uyaliphika icala aletheswayo, kodwa ukhulume kuphela eqinisekisa ukuthi uwazwile amacala abhekane lawo. Ubuyiselwe esitokisini njalo uzaphinda avele emthethwandaba mhlaka 23 Mfumfu.
Umtshutshisi, uNkosikazi Karen Gundani, utshele umthethwandaba ukuthi umsolwa kunye lomamangala bebethandana, njalo kubikwa baqala ubudlelwano babo mhlaka 5 Mpandula.
“Mhlaka 5 Mpandula, umsolwa wahlangana lomamangala kwesinye isitezi wasemkhombisa. Kubikwa ngosuku olufanayo babuye bahlangana emacansini.
Umthethwandaba uzwe njalo ukuthi umamangala wayeke avakatshele umsolwa endlini yakhe.
“Umntwana lo ubephuza ukufika emihlolisweni yakhe kaGrade 7 ebibhalwa ngoba ephuze ukusuka endlini kamsolwa,” kutsho umtshutshisi.
Ngolunye usuku ebusuku, unina kamamangala waya endlini yakhe yokulala esiyamdinga wafica engekho.
Unina uthe esesiya enkambeni yamapholisa ukuyabika, umamangala wafika. Wathi ebuzwa ukuthi ubengaphi wachaza ukuba ulele ngakibo kwejaha lakhe.
Unina wabikela amapholisa ngodaba lolu, okwabangela ukuthi uSithole abotshwe.
