Online Reporter
YiNtatheli kaMthunywa
ZIKHUZA umhlolo izakhamizi zesiqintini seGadade, eNtabazinduna kulandela ukuzwa ngenye indoda etshaywe yinkosazana ivela ebhawa yedlula emhlabeni.
Isiga lesi senzakale ngoLwesihlanu kuviki ephelileyo, lapho indoda le, uStrike Moyo oleminyaka engu-63 yokuzalwa atshaywe khona lizulu evela ebhawa eseduzane.
Kubikwa owesilisa lo, wayezinathela utshwala ezikwejisele labanye ebhawa eseduze ngaphambi kokuba kuqale umoya omkhulu.
Indoda le kubikwa yasuka sekuhlwile isibalekela izulu ukuthi limthole esefikile ngakwakhe.
Kubikwa wathi esebucwadlana nje lomuzi wakhe watshaywa yinkosazana wahle wedlula emhlabeni.
Isidumbu sitholakale ngelanga elilandelayo esedingwa ngunkosikazi wakhe ngemva kokuthi engalalanga ekhaya okuyisenzo abengakaze asenze.
Esinye isakhamuzi esikhulume lentatheli, esingathandanga ukuqanjwa ngebizo sithe lokhu ngokokuqala ukwenzakala esigabeni sakithi njalo asilankani.
“Lokhu okwehle emulini yakoMoyo kasikaze sikubone, kuyaqala ukwenzakala kulesi isigaba lokhe sahlala lapha.
“Asazi mhlawumbe kulesandla somuntu ngoba singakaze sizwe ngesehlakalo esifana lalesi ngesikhathi sezulu lembolisa mahlanga.
“Kubuhlungu futhi kunzima ukukwamukela ngoba uBaba uMoyo ubengumuntu ophila kuhle labantu okwenza sizibuze ukuthi kungabe kuphambaniseke ngaphi,” kutsho isakhamuzi lesi esingathandanga ukuqanjwa ngebizo.
Omele isikhulumi samapholisa esabelweni seMatabeleland North uAssistant Inspector Stanford Mguni uxwayise umphakathi ukuthi ngesikhathi sezulu bacitshe omakhalekhukhwini lakho konke okulamagetsi ezindlini.
“Sikhuthaza uzulu ukuthi angahambi endaweni eziligceke loba ukuthi bacatshe ngaphansi kwezihlahla ezinkulu ngoba kungabangela izingozi ezifana lale,” kuphetha uAsst Ins Mguni.
